DILI, 19 Dezembru 2025 (TATOLI)–Ministériu Ensinu Superiór, Siénsia no Kultura (MESK) no Universidade Nasionál Timor Lorosa’e (UNTL), halo abertura ba pontu ezame ba rejime tolu ne’ebe atu asesu ba UNTL no Institutu Politékniku Betanu (IPB).
Ministeru Ensinu Superiór Siénsia no Kultura, José Honório da Costa Pereira Jerónimo, hateten rejime tolu ne’ebé mak ohin halo abertura ba sira-nia pontu ezame mak rejime veteranu nia oan, rejime hakbiit no rejime oportunidade ne’ebé tuir ona ezame iha 02-05 Dezembru tinan ne’e.
“Atividade koresaun tinan-tinan ita halo ba estudante foun sira-ne’ebe mak ramata ona sira-nia estudu iha tinan 2022 to’o mai iha 2024. Ida-ne’e ita halo no ita agradese ba Prezidente Komisaun Asesu ba Ensinu Superiór ne’ebé prepara matéria ezame sira no halo ezame ona entaun ohin ita tenke halo korresaun,” nia dehan ba jornalista sira iha sala reunian MESSK, Kolmera, Sesta ne’e.
Nia hatutan estudante ne’ebé halo rejistu atu asesu ba UNTL no IPB hamutuk 1.688 no husi númeru ne’e partisipa ezame hamutuk 1.460 no la partisipa iha ezame 228.
Rejime oportunidade ne’ebé inísiu rejista hamutuk 1.186 no ema ne’ebé tuir ezame iha 1.001 no la partisipa iha ezame hamutuk 185. Ba rejime veteranu nia-oan, rejista dahuluk hamutuk 162. Husi númeru hirak-ne’e partisipa ezame iha de’it 151 no la partisipa ezame 11 no iha rejime hakbiit inísiu rejistu hamutuk 284, tuir ezame 261 no la tuir ezame 23.
“Ita hatene katak ita tama ona Asosiasaun Nasaun Sudeste Aziátiku (ASEAN-sigla ingleza) entaun ita tenke prepra ita-nia rekursu ho di’ak no kualidade sai líder iha fututu, tanba ne’e mak korresaun ne’e importante,” José Honório informa.
Iha biban ne’e, ministru husu nafatin ba komisaun ne’ebé kaer mákina korresaun tenke halo korresaun ho di’ak no ho rigór tuir regra ne’ebé mak iha ona atubele hetan estudante sira ho prestasaun di’ak hodi aasesu ba instituisaun rua ne’e.
Jornalista: Osória Marques
Editór: Xisto Freitas da Piedade
