MKI realiza enkontru ho vendedór ambulante sira hodi rona preokupasaun
DILI, 19 Dezembru 2025 (TATOLI)-Ministériu Komérsiu no Indústria (MKI) realiza enkontru ho vendedór ambulante sira hodi rona sira-nia preokupasaun sira, liuliu ba Natividad negósiu ne’ebé sira halo.
Ministru Komérsiu no Indústria, Filipus Nino Pereira, hateten enkontru ne’e importante tanba vendedór ambulante nu’udar setór informál ne’ebé tulun Estadu no Governu, liuhusi sira-nian esforsu hodi kria rasik serbisu ba sira-nia an no kontribui ba dezenvolvimentu nasaun nian.
Governante ne’e dehan maski vendedór ambulante sira la rejistadu, maibé sira ho inisiativa rasik halo negósiu oioin hodi fornese ba konsumidór sira, tanba ne’e Governu presiza tau matan ba sira.
“Governu kontinua fó atensaun oinsá mak ita bele organiza sira ho di’ak, hanesan fó formasaun ka materiál ruma, maibé ida-ne’e ita sei koordena ho Autoridade Munisípiu Dili no Sekretariu Estadu Asuntu Toponímia no Organizasaun Urbana (SEATOU) atu haree fatin ne’ebé própriu ba sira fa’an, nune’e labele duni bá-mai”, Nino Pereira hateten iha salaun MKI Bebora, Dili.
Nia dehan MKI sei halo koordenasaun ho parte relevante sira atu haree ba kestaun vendedór ambulante sira, tanba Governu iha kompromisu labele husik sidadaun ida iha kotuk, maibé sei halo esforsu hodi apoia sira tanba daudaun Timor-Leste tama ona ba ASEAN, entaun kompetisaun merkadu ne’e sei mai maka’as.
“Nune’e ita tenke preparadu hodi hasoru. Agora mundu nakloke, nune’e obrigasaun Governu nian mak tenke proteje ninia ema no ninia negósiu. Ita sei halo esforsu tanba ita tama ASEAN, ida-ne’e oportunidade maibé mós dezafiu ida ba ita, nune’e ita tenke organizadu hodi hasoru kompetisaun hotu sei mai ne’e”, dehan.
Iha biban ne’e, nia parte husu ba vendedór ambulante sira hodi organiza malu sai grupu ida ka kooperativa ida mak halo negósiu. Nune’e, apoiu ne’ebé Governu fó ba grupu ne’e mak kontinua fó ba ninia membru sira.
Iha enkontru ne’e, vendedór ambulante sira agradese ba MKI tanba rona sira-nia preokupasaun durante fa’an iha dalan ninin.
“Ami hanesan fa’an nuu iha dalan ninin husu Governu karik bele labele muda hotu ami ba Manleuana ka Taibesi, maibé kria fatin iha tasi-ibun mak ami fa’an, selu taxa ba Estadu. Tanba nuu ne’ebé ami fa’an tenke iha tasi-ibun atu ema sosa, nune’e ami presiza de’it fatin, ami prontu kontribui ba dezenvolvimentu nasaun nian”, nia asegura.
Iha fatin hanesan, vendedór ambulante Maria Fátima prontu koopera ho Governu atu fa’an iha ne’ebé de’it, maibé tenke kria fatin ne’ebé dignu.
Nia akresenta katak atu kontribui ba dezenvolvimentu nasaun, nu’udar povu koopera maibé Estadu mós tenke koopera no tulun povu kria kondisaun ne’ebé di’ak, nune’e labele okupa espasu públiku hodi fa’an.
Reprezenta Prezidente Autoridade Munisípiu Dili, Xefe Gabinete Autoridade Munisípiu Dili (AMD), Júlio da Silva, hateten relasiona ho preokupasaun vendedór ambulante sira kona-ba fatin mak halo hela esforsu oinsá atu kria fatin ne’ebé dignu. AMD halo hela kooperasaun ho liña ministeriál sira atu rezolve problema negosiante ambulante nian.
“Ita mós hakarak relata katak ita rekolla hela dadus negosiante ambulante sira, maibé seidauk hotu tanba tanba pesoál fa’an ne’e barak tebes. Ita halo hela esforsu oinsá kria fatin di’ak ba imi atu imi fa’an, SEATOU labele duni imi bá-mai”, nia garante.
Jornalista: Arminda Fonseca
Editora: Maria Auxiliadora
