VIKEKE, 19 Dezembru 2025 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes, apela ba abitante husi Munisípiu Vikeke kria pás iha tempu natál 2025 no tinan foun 2026.
“Selebra loron natál no simu tinan foun ami hakarak apela ba abitante Munsípiu Vikeke tenke kria pás no estabilidade hodi simu Kosok-osan Jezús. Aleinde ne’e, ami husu mós abitante sira labele sunu fogeti tanba ne’e kontra bandu,” António ba TATOLI iha nia kna’ar fatin, Vikeke, Sesta ne’e.
Komandante PNTL Munisípiu Vikeke ne’e salienta, misa ba kalan natál PNTL sei koloka membru sira bá Igreja no kapela sira-ne’ebé selebra misa natál iha 24 Dezembru atu asegura estabilidade.
Aleinde ne’e, António dehan, PNTL Munisípiu Vikeke sei hetan apoia husi FALINTIL-Forsa Defeza Timor-Leste (F-FDTL) hodi halo operasaun konjunta iha tempu natál no tinan foun.
“Ha’u fiar katak husi forsa konjuta ne’e sei halo vijilánsia di’ak ba tempu natál no simu tinan foun nian iha munisípiu Vikeke.Tan ne’e, ha’u husu parte juventude Munisípiu Vikeke tenke fó kontribuisaun ba pás ka hakmatek iha Munisípiu Vikeke,” nia tenik.
Entretantu, tuir dadus, membru PNTL Munisípiu Vikeke hamutuk na’in-135 ne’ebé daudaun ne’e ativu servisu iha Munisípiu Vikeke inklui eskuadra lima.
Jornalista: Vitorino Lopes da Costa
Editór: Xisto Freitas da Piedade
