TL-Australia diskute estabelsimentu kooperasaun iha área kombate korrupsaun
DILI, 19 Dezembru 2025 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas ho delegasaun hala’o enkontru kortejia ho delegasaun Austrália hodi aborda kona-ba futuru estabelesimentu parseria kooperasaun entre nasaun rua iha área kombate korrupsaun, krime transnasionál no krime organizadu sira.
Tuir nota ne’ebé Tatoli asesu husi media MNEK katak, reuniaun ne’ebé hala’o iha ámbitu Konferénsia Internasionál Anti Korrupsaun iha Doha, Qatar ne’e, Governu Austrália hakarak apoiu Timor-Leste área kapasitasaun rekursu umanu no mós estabelese parseria kooperasaun entre nasaun rua iha área kombate korrupsaun krime transnasionál no krime organizadu sira.
Reuniaun ne’e, parte rua konkorda atu identifika nesessidade ba kapasitasaun rekursu umanu ba investigadór sira kona-ba investigasaun kriminál inklui sei kopera ho estadu-membru ASEAN sira hodi fahe esperiénsia sobre mekanizmu kombate korrupsaun no krime sibernétika iha rejiaun.
Durante sorumutuk, Diretór Nasionál Polísia Sientífika Investigasaun Kriminál (PCIC), Vicente Fernandes Brito fahe Timor-Leste nia esperiénsia kona-ba mekanizmu kombate korrupsaun ho transnasionál sira.
Enkuantu, delegasaun Timor-Leste partisipa mós iha enkontru ne’e mak Komisáriu Komisaun Anti Korrupsaun (KAK), Rui Pereira dos Santos ho nia Adjuntu, Diretor Nasional PCIC, Vicente Fernandes Brito, Deputada Virginia Ana Belo no Adjunta Prokuradora Jerál Repúblika, Angelina Saldanha.
Tatoli
