DILI, 19 Dezembru 2025 (TATOLI)—Timor-Leste ne’ebé reprejenta husi Ministru Negósiu Estranjeiru no Kooperasaun (MNEK). Bendito dos Santos Freitas, no delegasaun partisipa iha sesaun Konferénsia Estadu Parte (COSP11) Konvensaun Nasaun Unida nian ba da-11 kontra Korrupsaun, ne’ebé hala’o husi loron 15 to’o 19 Dezembru 2025, iha Doha, Qatar, ho tema “Forma Integridade Aban nian”.
COSP11 ne’ebé organiza husi Estadu Qatar iha koordenasaun ho Eskritóriu Nasun Unida kona-ba Droga no Krime (UNODC), halibur Estadu Parte, signatáriu, Estadu observadór, organizasaun internasionál, sosiedade sivíl no espesialista sira, forma forum ida atu avalia progresu iha implementasaun Konvensaun, debate dezafiu ne’ebé mosu no adota rezolusaun sira-ne’ebé orienta prioridade globál kona-ba kombate korrupsaun.
Sesaun abertura ne’e loke husi Primeiru-Ministru no Ministru Negósiu Estranjeiru Qatar nian, Sheikh Mohammed Bin Abdulrahman Bin Jassim Al Thani.
Iha serimónia ne’e, Prezidente sesante husi Konferénsia Estadu Unidu nian, Christine Cline, ofisialmente entrega prezidénsia ba Primeiru-Ministru no Ministru Negósius Estranjeiru Qatar hodi lidera sesaun ida-ne’e.
Iha vídeo ida-ne’ebé aprezenta iha abertura ne’e, Sekretáriu-Jerál Nasoins Unidas, António Guterres, apela atu uza teknolojia emerjente iha luta hasoru korrupsaun, krime organizadu no forma krime sira seluk, hodi hateten katak korrupsaun la’ós krime ida-ne’ebé laiha vítima.
Hanesan krime ida-ne’ebé hamosu konflitu, hametin dezigualdade no hamenus rekursu nesesáriu atu proteje ema no planeta ne’e. Kada dolar ne’ebé lakon tanba krime ekonómiku, ida-ne’e mak dolar ida-ne’ebé na’ok husi sira-ne’ebé hakarak luta ba futuru ida-ne’ebé di’ak-liu.
Iha okaziaun ne’e, Prezidente Asembleia Jerál Nasaun Unida nian, Annalena Baerbock, hateten prevene no halakon korrupsaun importante hodi lori moris di’ak ba povu.
“Prevene no halakon korrupsaun ne’e nu’udar responsabilidade hamutuk. Ita deve ba ema-ne’ebé ita servisu ba,” Annalena hateten liuhusi nota ne’ebé Tatoli asesu husi media MNEK, ohin.
Nu’udar Estadu Parte ba Konvensaun Nasaun Unida kontra Korrupsaun, Timor-Leste hetan reprezentasaun iha konferénsia ne’e husi Ministru Negósiu Estranjeiru no Kooperasaun. Parlamentu Nasionál reprezenta husi deputada Virgínia Ana Belo no ekipa Komisaun Anti-Korrupsaun.
Sesaun Konferénsia ba da-11 ne’e sei hala’o to’o loron 19 fulan-Dezembru, ho sorumutu plenária, diálogu nivel aas no eventu paralelu sira-ne’ebé dedika ba reforsu kooperasaun internasionál no asaun koletiva iha kombate korrupsaun.
TATOLI
