Traballadór timoroan Manuel nia mate-isin hetan ona
DILI, 19 Dezembru 2025 (TATOLI)— Kapitaun embarkasaun peskária Korea nian ida hetan mate-isin traballadór timoroan, Manuel De Alburquerque, ne’ebé lakon ka mout iha tasi iha 25 Novembru 2025, tuku 08h20 dadeersan.
Traballadór peskadór timoroan ne’e mate bainhira kompleta atividade kolleta ostra iha fazenda ostra ida-ne’ebé lokaliza iha tasi Jiseok-ri, Sadong-myeon, Geoje-si, no hetan fila-fali nia mate-isin iha sesta (19 Dezembru 2025) ne’e, iha tuku 08h40 dadeersan, iha ilka náutika iha diresaun nordeste husi Hwado, Sulyeok-ri, Dundeok-myeon, Geoje-si.
Identidade mate konfirma liu husi identifikasaun impressaun liman (fingerprint) iha oras aproximadu 10h58, iha 19 Desembru 2025.
Mate-isin agora dadauk sei iha Polisia Maritima Tongyeong hodi hein prosesu Autópsia no sei hala’o atu determina ho klaru kazu morte nian. Hafoin autópsia kompleta, mate-isin sei entrega ba parte Governo liuhusi Embaixada no SEFOPE (Agenda autópsia agora dadaun iha prosesu koordinasaun ho Servisu Forénsiku Nasional korea),
Parea Governu Timor-Leste liuhusi Embaixada Repúblika Demokrátika Timor-Leste iha Korea, hamutuk ho SEFOPE sei nafatin akompaña no hala’o prosesu mate-isin hodi halao transladasaun hodi lori fila ba Timor-Leste no entrega ba Familia.
Matebian Manuel De Albuquerque moris iha 11 Jullu 1995 ho Númeru Pasaporte: 0238015C.
TATOLI
