DILI, 21 Dezembru 2025 (TATOLI)-Governu hatuur, iha sábadu ne’e, fatuk dahuluk ba konstrusaun edifísiu Ministériu Obra Públika (MOP), ne’ebé lokaliza iha antigu edifísiu Institutu Jestaun Ekipamentu no Apoiu Dezenvolvimentu Infraestrutura (IGEADI), iha Kolmera, Dili.
Projetu konstrusaun ne’e iha responsabilidade empreza PT. Nusa Konstruksi Engineering TBK Indonézia, ho durasaun tinan rua ho balun. Fundu ba insfraestrutura ne’e ho montante millaun $18-resin.
Ministru Obra Públika, Samuel Marçal, hateten ministériu ne’e serbisu maka’as, tanba ne’e halo esforsu hodi konstrui edifísiu foun ba MOP.
“Serbisu ne’e la’ós ita mesak, maibé envolve entidade barak. Antes atu aprova projetu ida tenke liuhusi prosesu aprovizionamentu Estadu nian. Maski konstrusaun ne’e seidauk hahú maibé pelu menus iha ona finál ida hodi garante ba ita katak bele harii ona edifísiu foun”, ministru informa ba iha Kolmera.
Tanba ne’e, nia solisita ba empreza atu implementa projetu konatrusaun ida ho di’ak no tuir kontratu ne’ebé determinadu, tanba edifísiu ne’e atu uza ba funsionentu servisu husi diresaun to’o ministériu.
Jornalista: Alexandra da Costa
Editora: Maria Auxiliadora
