DILI, 22 Dezembru 2025 (TATOLI) – Telemor aseita no rekoñese katak ambiente ne’ebé moos mai husi ema hotu nia konsiénsia ne’ebé di’ak no sai hanesan ema hotu nia responsabilidade.
“No, sei kontinua kontribui ba Timor-Leste ne’ebé matak liu no saudavel liu ho programa sosiál no ambientál sira hanesan iha futuru,” refere komunikadu husi empreza telekomunikasaun Telemor, ba TATOLI, ohin.
Kompromisu ida-ne’e, Telemor hato’o, relasiona ho atividade limpeza ne’ebé empreza ne’e halo iha tasi-ibun antes ramata tinan-2025, hahú husi área parke no tasi-ibun B.J. Habibie to’o tasi-ibun Largo Lecidere, Dili iha loron 20 Dezembru 2025 dadeer to’o ramata.
Atividade ne’e mosu ho inisiativa husi Telemor rasik atu:
- Hamoris konsiénsia públika kona-ba ambiente no kultura moris Moos;
- Apoia esforsu governu no komunidade nian hodi proteje tasi moos iha Dili laran;
- Enkoraja parte hotu nia asaun atu prezerva fatin públiku sira, no
- Taka tinan-2025 ho impaktu pozitivu no signifikativu ba sosiedade;
Entretantu, limpeza iha tasi-ibun ne’e nu’udar parte husi programa Responsabilidade Sosiál Empreza Telemor iha fulan ikus tinan-2025.
Atividade ne’e envolve direta empreza Telemor nia Diretór Jerál, Jerente, Ofisiál sira no mós funsionáriu Telemor hotu-hotu ne’ebé hamutuk servisu hodi hamoos tasi-ibun no área públika sira iha li’ur, hodi hatudu kompromisu empreza nian ba protesaun ambientál, responsabilidade sosiál, no dezenvolvimentu sustentavel.
TATOLI
