DILI, 22 Dezembru 2025 (TATOLI)–Defensór Públiku Jerál, Cancio Xavier, hateten, iha Kuarta (17/12) foin lalais ne’e, Konsellu Superiór Defensoria Públika hasai ona desizaun hodi suspende ajente Defensór Públiku na’in-tolu tanba viola regra dentolojia ne’ebé hakerek iha estatutu Defensoria Públika.
“Motivu ba suspensaun ne’e tanba razaun serbisu ida-ne’ebé ladún apar ho étika dentolojia no violasaun ba regra estatutu Defensória nian. Suspensaun ne’e minimál fulan-ida to’o neen,” Cancio Xavier hato’o ba Ajénsia TATOLI iha ninia knaar fatin, Kintál-boot, Segunda ne’e.
Maski nune’em Defensór Públiku na’in-tolu ne’e nafatin iha prezunsaun ba inosénsia.
“Ita pelu menus iha tolu prosesu disiplinar ita la’o, maibé ha’u hanoin kestaun disiplinar ne’e nafatin iha prezume inusénsiamente, tanba tuir prinsípiu ida-ne’e ita la hateten dehan sira sala ga lae, maibé prosesu ne’e la’o,” nia akresenta.
Cancio dehan, Ajente Defensór Públiku sira tenke halo serbisu sein onoráriu husi nia asistidu sira no tenke tuir estatutu foun Defensoria Públika númeru 21/2023.
Notísia relevante : PN aprova orsamentu ba Tribunál, PJR no Defensoria Públika
Nia hatutan, kuandu ajente Defensoria Públika Jerál mak serbisu la tuir ida-ne’e maka konsidera viola estatutu no étika dentolojia no profisionalizmu.
Defensór Jerál ne’e hateten, maski nune’e, Inspetór Defensoria Públika sei haree kazu ne’e.
“Mekanizmu sira ne’ebé estabelese iha Dekretu-Lei númeru 21 novo estatutu Defensoria Públika hatuur ona iha Inspetoria iha Konsellu Defensoria Jerál buat sira ne’e dokumentu sira nu’udar órgaun estatál Estadu nian hodi bele garante sustentabidade ne’ebé dezenvolvimentu institusionál ne’ebé di’ak no dignu,” nia afirma.
Defensoria Públika nu’udar institusaun Estadu ida-ne’ebé garante serbisu sustenta vizaun ne’ebé ho di’ak tanba Defensoria Públika foin hahú dékada ida ka rua ho balun sempre mosu problema sira.
“Defensoria Públika nu’udar instituisaun Estadu atu kontinua nafatin kontribui ba dezenvolvimentu nasionál. Tanba dezenvolvimentu atu sustenta setór Justisa,” nia dehan.
Jornalista : Natalino Costa
Editora : Julia Chatarina
