KOVALIMA, 19 Dezembru 2025 (TATOLI) – Diretora Servisu Munisipál Edukasaun Kovalima ,Elda de Fátima, informa katak eskola hotu iha Kovalima, ohin fó sai ona rezultadu ezame nasionál ne’ebé rezultadu hatudu katak alunu finalista na’in-49 maka reprovadu.
“ Tuir dadus alunu finalista husi ensinu báziku nonu ano hamutuk na’in-1.320 husi númeru ne’e rezultadu ezame nasionál alunu finalista ne’ebé maka aprovadu hamutuk 1,287 no reprovadu 33. Alunu finalista husi ensinu sekundáriu 1,257 husi númeru aprovadu 1,253 no la reprovadu 16, alunu finalista ensinu tékniku vokasionál aprovadu hotu”, Dirijente Edukasaun Kovalima, Elda de Fátima , relata dadus ne’e ba jornalista, iha Santa Rosa , ohin.
Tuir rezultadu ezame nasionál alunu finalista husi eskola-sira iha Kovalima hamutuk na’in-49 maka reprovadu, tanba sira-nia valór durante tuir ezame nasionál iha loron 20 Outobru iha tinan letivu 2025 la to’o no iha ezame nasionál sira-nia valór 5 hamutuk tolu.
Alunu finalista ne’ebé reprovadu iha ezame nasionál husi Eskola bázika Centrál EBC) Ladi na’in-hitu, Sandalo na’in-hitu (7), EBC Salele na’i-19 no husi Eskola sekundáriu Jerál Públiku (ESGP) Suai na’in-16
“ Ami nia alunu finalista hamutuk 689, nune’e bazeia ba rezultadu ezame nasionál ne’ebé fó sai rezultadu katak alunu na’in-16 maka la pasa iha ezame nasionál”, nia informa.
Tuir dadus alunu husi ensinu sekundáriu jerál públiku Suai na’in-689 maka tuir ezame nasionál kompostu husi Siénsia Téknolojia 364 no programa Siensia Sosiais no Humanidade (CSH) 325.
Jornalista: Celestina Teles
Editór:Florencio Miranda Ximenes
