DILI, 22 Dezembru 2025 (TATOLI)—Ministru Obra Públika, Samuel Marçal, konsidera prosesu dezenvolvimentu infraestrutura estrada no eletrisidade iha Ataúru hodi promove setór turizmu.
Nia hatutan, prosesu nahe alkatraun ba reabilitasaun estrada iha Ataúru halo komunidade kontente tanba hahú husi tempu portugés Ataúru uluk hanesan fatin izoladu maibé agora Governu tau hotu eletrisidade, tanba Ataúru iha ninia fatin turizmu ne’ebé kapaas tebes hodi atrai ema ba vizita no promove setór turizmu.
“Hanesan ita haree baibain iha tempu feriadu timoroan no ema eatranjeiru sira ba vizita Ataúru ne’e bele to’o 500, ne’e hatudu katak Ataúru sei sai poténsia turizmu nian. Maibé husi parte MOP fasilita de’it fasilidade infraestrutura bázika enkuantu kona-ba jestaun rasik sei responsável husi ministériu seluk,” Ministru Samuel Marçal informa ba Agência Tatoli, iha nia kna’ar fatin, Kaikoli, ohin.
Nia dehan, Timor-Leste iha ninia poténsia barak no fiar katak ho dezenvolvimentu fasilidade sira-ne’ebé Governu halo bele atrai ema mai hodi halo investimentu
Enkuantu, projetu ne’e implementa husi empreza Tinolina Unipessoál, Lda, durante tinan ida ho balun ho montante osan hamutuk $3.250.843,98.
Jornalista : Alexandra da Costa
Editór : Cancio Ximenes
