KOVALIMA, 22 Dezembru 2025 (TATOLI)-Tuir dadus gráfiku husi Polisia Nasionál Timor-Leste (PNTL), munisípiu Kovalima rejista hahú fulan-janeiru to’o meadu fulan-dezembru 2025 rejista kazu ofensa integridade hamutuk kazu 65.
“Ita rejista kazu hamutuk 159 husi númeru ne’e kazu ofensa integridade maka aas tanba totál kazu hamutuk 65 no mós kazu sira seluk ,” Superintendente Polísia, Inasio Amaral relata dadus ne’e ba jornalista sira iha Komandu PNTL Santa Rosa.
Komandu PNTL Kovalima mós rejista kazu violénsia doméstika hamutuk 38, kazu estraga sasan, abuzu seksuál hamutuk ualu, kazu furtu agravadu iha kazu 11, ameasa, suisidu kazu haat, no kazu omesídu ida.
Kona-bá prosesu ba kazu hirak ne’e, PNTL Kovalima halo ona prosesu investigasaun no kazu balun haruka ona ba Ministériu Públiku hodi prosesa tuir lei ne’ebé maka vigora.
Entertantu, dadus estatístika PNTL Kovalima tinan 2024 rejista kazu kriminál hamutuk 229, hanesan kazu ofensa integridade, kontra bandu, omesídu, suisídiu, kazu ameasa no violénsia doméstika maka aas.
Jornalista :Celestina Teles
Editór :Florecio Miranda Ximenes
