DILI, 22 Dezembru 2025 (TATOLI)–Prezidente Repúblika, José Ramos-Horta, segunda ne’e, realiza enkontru ho membru Konsellu Superiór Defeza Seguransa sira hodi diskute kona-ba situasaun rai-laran.
“Reuniaun ne’e atu haree ba situasaun seguransa iha rai-laran no-mós asuntu seluk ne’ebé ha’u labele fó sai ba públiku,” Primeiru-Ministru, Kay Rala Xanana Gusmão, hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, durante enkontru ne’e Xefe Estadu hato’o agradesementu ba sosiedade hotu ne’ebé kontinua mantein pás no husu situasaun ne’e kontinua nafatin iha festa Natál (25 Dezembru 2025) no Tinan Foun (01 Janeiru 2026).
“Prezidente agradese tebes ba sosiedade hotu tanba klima dame no domin metin tebes iha ita-nia rai, ho nune’e Prezidente hakarak ambiente hanesan ne’e kontinua nafatin to’o tinan foun,” Xanana dehan.
Iha oportunidade ne’e, Xefe Governu hato’o feliz natál no tinan foun ba povu Timor-Leste hotu atu hamutuk hateke ba oin hodi dezenvolve nasaun ne’e.
“Feliz natál no tinan foun ba ita hotu, mai ita hamutuk haree ba oin, saida mak ita halo ona no saida mak ita seidauk halo hodi kontinua ba oin. Buat ne’ebé presiza kurize tenke kurize, presiza halo buat foun tenke halo buat foun atu lori nasaun ne’e ba oin,” Xanana hateten.
Jornalista : Hortencio Sanchez
Editór : Cancio Ximenes
