KOVALIMA, 22 Dezembru 2025 (TATOLI)- Komunidade uma-kain 27 iha aldeia Sadahur, Suku Maudemo, Postu Administrativu Tilomar, Munisípiu Kovalima ladauk asesu eletrisidade.
“Postu Administrativu Tilomar Munisípiu Kovalima iha nia suku haat, aldeia 23 husi númeru ne’e aldeia 22 maka asesu ona eletrisidade, maibé komunidade aldeia Sadahur maka to’o ohin loron kontinua moris iha nakukun laran, tanba seidauk asesu eletrisidade”,Adminitradór Postu Administrativu Tilomar, Munisípiu Kovalima, Venáncio Sarmento dehan ba jornalista sira iha resintu AMC, ohin.
Autoridade postu Tilomar ne’e, dehan kona-bá komunidade seidauk asesu eletrisidade iha Maiu Ministériu promete katak iha Outobru atu hahú dada ona eletrisidade, maibé to’o ohin loron seidauk dada eletrisidade.
Ho problema ne’ebé mak komunidade enfrenta kona-bá seidauk asesu eletrisidade hanesan autoridade postu Tilomar, iha responsabilidade nune’e kontinua ejize ba Governu atu dada eletisidade ba komunidade.
Komunidade Aldeia Sadahur ho uma-kain 27 mak seidauk asesu eletrisidade, nune’e sira kontinua uza lampu tradisionál hodi nune’e komunidade sira bele sente nia ahi nia naroman bainhira iha tempu-kalan.
“Ha’u espera, tinan oin, ita-nia Governu instala ona eletrisidade ba ha’u nia komunidade iha Aldeia Sadahur ne’ebé maka hela besik iha estrada Internasionál tanba maioria komunidade iha aldeia sira seluk asesu ona eletrisidade. Aldeia Sadahur maka seidauk asesu eletrisidade”, nia informa
Postu Administrativu Tilomar viziñu ho Nasaun Indonézia mós haree iha tempu kalan komunidade balun hetan naroman no balun sei moris iha nakukun laran, maske autoridade postu submete ona pedidu, maibé to’o ohin loron seidauk iha rezultadu, nune’e halo komunidade kontinua moris iha nakukun laran.
Postu Administrativu Tilomar ,Munisípiu Kovalima iha nia suku Maudemo ne’ebé lokaliza iha parte súl besik Fronteira ho Indonézia inklui suku Lalaua, Kasabauk no Beiseuk ho nia aldeia 23.
Jornalista:Celestina Teles
Editór:Florencio Miranda Ximenes
