BOBONARU, 23 Dezembru 2025 (TATOLI)-Diretór Nasionál Transporte Terrestre (DNTT) delegasaun territoriál munisípiu Bobonaru, Tomás Maia, husu ba motorista sira atu labele aproveita selebrasaun loron natál 2025 no tinan foun 2026 hodi hasa’e tarifa bis diresaun Maliana bá Dili tuir idaidak nia hakarak, tanba to’o agora Governu seidauk halo mudansa ba tarifa anteriór $6.
Apelu ne’e Tomás Maia hato’o relasiona ho selebrasaun loron finadu foin lalais ne’ebé motorista balun hasa’e tarifa no hamosu preokupasaun públiku.
“Ami respeita imi tanba ita-boot sira halo viajen tula pasajeiru bá-mai, maibé tarifa ne’ebé estadu fó ne’e labele muda tuir ita-boot sira-nia hakarak, tanba ne’e la’ós ema ida nia hakarak, maibé despaxu ministru nian”, nia informa.
Dirijente ne’e subliña katak DNTT Bobonaru koloka ona funsionariu na’in-ualu bá halo observasaun rotina iha terminál Tunubibi hodi haree asuntu ne’e, liuliu sosializa tarifa bis no tula ho hatún pasajeiru.
Bainhira identifika katak motorista balun la obesede ba regra maka DNTT sei foti sansaun. “Ami sei foti ninia dukumentu no entrega ba polísia hodi selu infrasaun”, nia afirma.
Tuir dadus DNTT Bobonaro rejista, hahú tinan 2020 to’o 2022, autokarru ne’ebé halo operasaun entre Maliana no Dili hamutuk 32, husi númeru ne’e 21 mak sei opera tula pasajeiru.
Notísia relevante: DNTT Bobonaru halibur reseita rihun $152-resin
Jornalista: Sergio da Cruz
Editora: Maria Auxiliadora
