DILI, 23 Dezembru 2025 (TATOLI)—Ministériu Turizmu no Ambiente (MTA) atribui prémiu Habali Ambiente 2025 ba manán-na’in sira husi eskola ne’ebé partisipa iha kompetisaun Eskola Matak (Escola Verde) no fó prémiu apresiasaun ba grupu komunitáriu lima ne’ebé serbisu ho voluntáriu ba kuidadu ambiente.
Diretór-Jerál Ambiente husi MTA, Domingos Mesquita, informa katak kompetisaun Eskola Matak ne’e rasik tinan ne’e loke ba Ensinu Báziku Sentrál (EBC) 3º siklu hamutuk 26 husi munisípiu Dili, maibé bainhira inisia ho kampaña nasionál Eskola Verde nian ne’ebé halo abertura iha loron 07 Dezembru 2025, iha de’it eskola 19 mak partisipa.
Maibé, tama ba faze kompetisaun ekipa avaliasaun observa katak iha eskola ida mak rezigna-an, entaun iha de’it 18 mak kompete no avalia husi ekipa juri.
“Husi eskola 18 ne’e ita halo avaliasaun, ita klasifika ba primeiru, segundu no terseiru lugar to’o kuartu. Restu husi ne’e ita fó apresiasaun ba sira liuhusi orsamentu uitoan oinsá sira bele hadi’a sira-nia areadór eskola”, Domingos Mesquita hateten iha Sentru Kovensaun Dili, ohin.
Nia esplika katak eskola sira ne’ebé hetan klasifikasaun primeira mak EBC 3º Siklu São Pedro, Komoro, Dili, hetan prémiu taxa rotativa no taxa permanente ida ho osan $2.500, segundu lugar EBC 3º Siklu Santa Madalena de Canossa Has-Laran, Dili, hetan taxa permanente ida ho osan $2.000, terseiru lugár husi EBC 3º Siklu 30 de Agosto, hetan taxa permanente no osan $1.500.
Aleinde ne’e, iha EBC 3º Siklu haat mak sai kuartu lugár mak hanesan EBC 3º Siklu Manleuana, EBC 3º Siklu Esperansa da Pátria no seluk tan ho osan $1.000
“Ita mós fó apresisaun ba eskola sira seluk ne’ebé la tama klasifikasaun hamutuk 12 ho osan $500 hodi sira bele apoiu sira-nia eskola kuda ai-oan no seluk tan”, dehan.
Iha biban ne’e, MTA mós fó apresiasaun osan rihun $10 ba grupu lima ne’ebé sai voluntáriu hodi kuidadu ambiente.
Kada grupu sei hetan osan $2.000, grupu sira ne’e mak hanesan Grupu Defeza Ambiente, Grupu Movimentu Forsa Hadomi Natureza Ermera, Grupu Movimentu Konservasaun Bee Ulmera, Grupu Konservasaun Hamatak Rai Oeluan, Grupu Kooperativa Multisetorál Moris Ki’ak Liberta Hamutuk.
Profesór Konsellu Estudante husi EBC 3º Siklu São Pedro, Expedito Paulo Pinto Guterres, orgullu tanba sira-nia eskola bele sai vensedór iha kompetisaun Eskola Matak 2025.
“Prémiu ne’ebé ami hetan, ida-ne’e esforsu sira ne’ebé ami hamutuk ho estudante sira kuidadu ambiente halo eskola sai matak no moos, nune’e ho prémiu ne’ebé ami hetan ba oin ami esforsu halo di’ak liután”, promete.
Tuir nia, Programa Eskola Matak ne’e importante tebes tanba bele eduka estudante sira hadomi ambiente.
Ministru Koordenadór Asuntu Ekonómiku, Francisco Kalbuadi Lay, hato’o apresisaun ba eskola sira ne’ebé sai manán-na’in iha kompetisaun Eskola Matak 2025.
“Ha’u hato’o parabéns ba ita-sira ne’ebé kompete ona, maibé ha’u husu la’ós prémiu mak ita boot sira-nia partisipasaun, kuidadu ambiente mak importante”, dehan.
Nia dehan bainhira kuidadu ambiente mak sei sai furak ba nasaun haú husi agora to’o futuru. “Proteje ambiente la’ós Governu nia serbisu de’it, maibé ita hotu nian, oinsá ita kuidadu ambiente, tanba ambiente sai tipu sentrál ida iha mundu nune’e mós ba ita-nia rai”, ministru hateten.
Iha biban ne’e, nia adianta katak tinan oin sei ko’alia ho Ministra Edukasaun atu kompetisaun Eskola Matak ne’e bele implementa mós iha munisípiu hotu.
Notísia relevante: Eskola hamutuk 26 iha Dili partisipa iha kompetisaun Eskola Verde
Jornalista: Arminda Fonseca
Editora: Maria Auxiliadora
