Ministru José Honório solisita universidade simu estudante tuir área kursu
DILI, 23 Dezembru 2025 (TATOLI)—Ministru Ensinu Superiór, Siénsia no Kultura, José Honório da Costa Pereira Jerónimo solisita universidade sira atu simu estudante tuir área kursu iha ensinu sekundáriu.
Ho asuntu ida-ne’e, Ministériu Ensinu Superior Siénsia no Kultura (MESSK), tuir planu sei kria Lei ida hodi regula universidade privadu sira ne’ebé simu estudante la tuir área.
Objetivu husi kriasaun lei ne’e, nia esplika, atu evita universidade sira simu estudante la tuir área kursu ne’ebé sira aprende, bainhira sei iha ensinu sekundáriu. Ezemplu, finalista ne’ebé maihusi siénsia sosiál, labele foti kursu iha área médisina ka saúde nian iha universidade.
“Ba universidade sira tantu privadu no públiku, husu atu labele simu estudante ne’ebé la tuir nia área, hanesan siénsia sosiál ba fali siénsia ezata nian ne’e labele. Ezemplu, nia foti ekonomia nia bá fali enjeñaria ne’e la han malu ho nia diploma. Tanba ne’e, labele simu estudante la tuir nia área,” Ministru José Honório dehan ba jornalista sira iha nia kna’ar fatin, Kolmera, Dili, Tersa ne’e.
Governante ne’e hatutan, estudante tenke aprende tuir área nune’e iha koñesementu ne’ebé másimu.
Nune’e mós, Diretóra Jerál Ministériu Ensinu Superior, Siénsia no Kultura, Maria Filomena Lay hateten lei ne’ebé Governu sei kria, atu regula universidade privada sira atu bainhira simu estudante foun tenke tuir área, nune’e evita iha má pratika iha terrenu.
“Iha instituisaun ensinu superiór públiku, sé mak hili área enjeñaria ka área saúde, tenke nia background maihusi siénsia teknolojia, tanba área iha médisina jerál no área saúde nian, tenke konsta iha ensinu sekundáriu ne’ebé nia área siénsia teknolojia. Sé nia área husi siénsia sosiál labele ba iha área saúde, tanba laiha baze ruma ba kursu sira-ne’e,” nia subliña.
Maria dehan, tuir planu, lei ne’e sei kria hahú iha Janeiru 2026, nune’e bele regula universidade sira.
“Tanba ne’e, iha tempu badak, iha tinan letivu 2026, ami sei kria lei ka diploma ministeriál atu regula. Daudaun ne’e, ami prepara hela,” nia akresenta.
Jornalista: Osória Marques
Editór: Xisto Freitas da Piedade
