INCANTO sei fasilita traballadór timoroan na’in-haat ba servisu iha Singapura
DILI, 24 Dezembru 2025 (TATOLI)—INCANTO Group servisu hamutuk ho empreza internasionál Kenneth & CO, sei fasilita no haruka traballadór timoroan na’in-haat (4) ba servisu iha área ospitalidade iha Singapura
Jerente INCANTO Group, Joanico Jerónimo, hateten INCANTO servisu hamutuk ho ajénsia internasionál ida iha Singapura ne’ebé sei foka liu ba iha área ospitalidade hanesan iha restaurante KFC, Mac Donald, Starburg inklui loja.
Akordu ne’e sira hala’o ona iha tinan 2023 antes Timor-Leste seidauk sai membru ASEAN no seidauk haruka traballadór ba, maibé bainhira sai ona membru ofisiál ba ASEAN sira kontinua haruka ona traballadór ba servisu iha Singapura.
“Tanba lei la fó dalan ita atu rekruta kualker timoroan hodi ba servisu iha Singapura, nune’e objetivu ida-ne’e mós atu kria kampu traballu no mellora kapasidade timoroan hodi aprende iha área ospitalidade tuir estanda internasionál nian,” Jerente ne’e hateten ba Agência Tatoli liuhusi telefónika, ohin.
Nia hatutan, antes ne’e traballadór na’in haat kompostu husi feto tolu (3) no mane na’in ida (1) ne’e selesionadu husi estudante finalista Dili Intitute of Teclonogy, Departamentu Ospitalidade, hafoin ita halo prosesu rekrutamentu no entrevista.
“Nune’e kritéria bainhira atu ba servisu iha Singapura tenke iha kualifikasaun lian inglés tenke di’ak, idade tenke hahú husi 19-30 no tenke iha nivel lisensiatura. Maibé karik kandidatu sira iha de’it esperiénsia no laiha diploma lisensiatura ne’e labele tanba iha akordu define ninia rekezitu mak hanesan ne’e ona,” nia esplika.
Kona-ba sira-nia kontratu bazeia ba lei ne’ebé eziste iha Singapura normalmente traballadór husi nasaun seluk ne’ebé atu ba servisu iha ne’ebá ho durasaun fulan tolu (3), enkuantu dezempeñu servisu di’ak mak empreza sei bele estende to’o tinan ida (1).
“Traballadór estranjeiru sira sei simu saláriu fulan ida ho montante osan Singapura rihun $2, depende ba servisu iha balun bele simu saláriu to’o rihun $3.500, entaun traballadór ne’ebé agora daudaun atu ba ne’e balun sei hetan saláriu to’o rihun $3 no balun rihun $2.500 husi oras servisu ne’e oras 10 nia laran,” nia hateten.
Enkuantu, nia afirma kona-ba akomodasaun sira-ne’e, traballadór sira ida-idak sei hela iha apartamentu no selu husi sira-nia rendimentu no dalaruma mós responsável husi empreza rasik mak selu, no kona-ba sira-nia seguransa iha ne’ebá buat hotu kontroladu no laiha problema.
“Planeia ba tinan oin sira hakarak timoroan ne’ebé husi fresh graduate ne’ebé balun iha esperiénsia ona no balun seidauk iha, no sira sei loke formasaun lian inglés no ospitalidade ba joven sira hodi opta ba Singapura, tanba konsidera hanesan nasaun ne’ebé iha ninia ospitalidade avansadu tuir estandarnizasaun internasionál,” nia dehan.
Tuir informasaun, traballadór hirak ne’e sei aranka iha tinan 2026 tanba daudaun ne’e INCANTO sei prepara hela no prosesa billete no visa working hodi aprezenta ba SEFOPE, MNEK no halo karta kredensiál ida ba embaixada Timor nian iha Singapura.
Jornalista : Alexandra da Costa
Editór : Cancio Ximenes
