DILI, 24 Dezembru 2025 (TATOLI) – Iha misa kalan Natál iha Estasaun Menino Jesus de Praga, Manleuana, amu selebrante Vigáriu Parókia Motaél, Padre Inocêncio Barreto Lopes, iha nia omília hateten igreja katólika iha mundu selebra loron ksolok Natál nian ne’ebé Maromak halo nia an moris husi feto raan Maria nia knotak.
Nia dehan Maria kous Jezus hahú ho mistériu enkarnasaun ida, ida-ne’e realidade no la’ós ai-knanoik.
“Maria kous duni Maromak ida mai ita mak Jezus no nia mak Mesias Emanuel, katak Maromak hela ho ita. Nune’e Natál ida-ne’e nu’udar momentu renovasaun moris nian ka hahú ho tempu foun no roman foun nian”, amu Inocêncio hato’o iha nia esplikasaun, iha igreja Manleuana, Dili, kuarta ne’e.
Nia hatutan katak Natál nu’udar festa moris nian no roman nian, tanba Maromak haraik ninia an no husik nia tronu hodi tun mai moris hanesan ema no tama iha ema-nia istória atu ema bele partisipa iha Maromak ninia dignidade.
Tuir nia, iha afirmasaun seluk karik Maromak nia oan sai ema ninia oan atu ema-nia oan sira liuhusi Jezus sai Maromak oan.
“Maluk sira Kosok-oan ida ne’ebé ho neras toba iha balada han fatin, ida-ne’e mak sai sasin ba realidade mundu nian, mundu ne’ebé dalabarak ki’ik no ki’ak sira la hetan dignidade iha ema boot no ukun-na’in sira-nia matan”, nia dehan.
Nune’e, Jezús lori roman ba nia povu, roman ne’ebé atu ema la’o tuir, no Natál la’ós festa boot ba ema riku nian, maibé ne’e festa simplesidade nian.
“Natál fó sai mai ita Maromak halo an ba ema, Maromak tun mai partisipa ema-nia frajilidade no simplesidade sira hodi hatudu dalan ba rai-klaran tempu ne’ebé ema barak lakon ona dame iha sira-nia fuan”, nia hateten.
Nune’e, festa natál ida-ne’e nu’udar roman família nian, Natál la’ós memória, maibé nu’udar tempu renovasaun ba idaidak nia moris tanba kada ema halo istória ho Maromak rasik hodi hahú tempu ka espasu foun.
“Glória iha lalehan, dame iha rai-klaran, tanba Maromak tun mai mundu atu harii dame ba ita”, nia konklui.
Notísia relevante: Selebra Natál-tinan foun lori ksolok no esperansa ba dezenvolvimentu
Jornalista: Arminda Fonseca
Editora: Maria Auxiliadora
