Pe. Heriberto: Selebrasaun natál lori dame no domin  

VIKEKE, 24 Dezembru 2025 (TATOLI)–Iha selebrasaun misa natál iha Parókia Uatulari, Munisípiu Vikeke, Kuarta (24/12), Pároku Parókia Uatulari, Pe. Heriberto Soares Pedro hateten selebrasaun loron natál ne’e lori dame no domin ksolok nian ba sarani sira hotu.

“Selebrasaun natál ne’e bolu filafali sarani sira bá Belén rasik hodi rekoñese aan, hakarak sosiedade ne’ebé nakloke, sosiedade nian prezensa ho domin,” Pe. Heriberto hateten iha nia omília.

Nia haktuir bainhira túr ho ema rai seluk, ema hateten relijiaun katólika iha Timor ne’e pursentu boot tebetebes, maibé  tanba saida  mosu tuda malu, mosu ódiu malu, mosu korrupsaun no abuzu podér barbarak?

“Tan ne’e hakarak fanu filafali sarani sira liuhusi natál ne’e atu ita simu ita-nia Kosok-oan ne’ebé moris iha Belén no hakribi hahalok aat sira,” nia subliña.

Padre hatutan selebrasaun natal la’ós selebrasaun tinan ikus, maibé natál sai selebrasaun ida moris loroloron nian tanba ema hotu-hotu hadomi moris.

“Maromak hadomi ita tanba ho domin ne’e rasik Maromak haruka ona nia oan Jezús mai moris hamutuk ho ita. Tanba dalan importante ne’ebé hakarak lori filafala ita hotu bá Maromak mak ida-ne’e, oinsá hadomi Maromak iha ita-nia moris, ita simu kristu nia futar isin no raan, atu ita-nia moris iha Maromak nia liafuan di’ak hodi transforma ita la sai sarani ne’ebé di’akliu, maibé sai sarani di’ak hodi serbí ita-nia família no serbí ita-nia sosiedade,” nia hato’o.

Entretantu, tuir obsevasaun jornalista TATOLI, ih aselebrasaun misa natal iha Parókia Uatulari la’o ho hakmatek tanba hetan seguransa husi Polísia Nasionál Timor-Leste (PNTL) Eskuadra Postu Uatulari.

Partisipa misa selebrasaun natál iha Porókia Uatulari ne’e kompostu husi autoridade lokál, veteranu no sarani sira.

Jornalista: Vitorino Lopes da Costa

Editór: Xisto Freitas da Piedade