KOVALIMA, 24 Dezembru 2025 (TATOLI) – Komandu Polísia Nasionál Timor-Leste (PNTL), Munisípiu Kovalima bandu joven sira atu hemu tua no toka múzika iha prezépiu, nune’e populasaun selebra Natal 2025 no Tinan Foun 2026 ho hakmatek.
Komandante PNTL Kovalima,Superintendente Polísia, Inacio Amaral dehan, Atu garante seguransa durante selebra loron boot natal no tinan foun inan aman no joven sira presiza servisu hamutuk ho komandu PNTL Kovalima.
“Ha’u nia mensajen ba komunidade sira iha munisipiu Kovalima postu administrativu hitu espesial ba komunidade iha kapitál munisípiu, ita presiza servisu hamutuk hodi selebra loron Natal no Tinan Foun, nune’e ita bele selebra loron boot ho pás no hakmatek”, Superintendente Polísia, Inacio Amaral, dehan ba jornalista-sira, iha Santa Rosa, ohin.
Ho nune’e nia dehan, joven-sira ne’ebé maka hari’i prezépiu iha estrada ninin iha kada bairru labele hemu tua, labele toka múzika la’os Natal nian no labele dahur hodi selebra loron boot Natal iha prezépiu laran.
“Inan-Aman sira ita presiza atu fó hanoin oan sira atu evita sunu fogete tanba fó risku ba labarik sira. Bainhira sunu fogete la tuir dalan bele hakanek no hamate labarik sira”, nia afirma.
Komunidade sira ne’ebé maka ba misa labele viola regra tránzitu no bainhira ba misa uza transporte tenke lori dokumentu no uza kapasete, nune’e bainhira asidente no insidente rum abele salva vida.
Jornalista: Celestina Teles
Editór:Florencio Miranda Ximenes
