KOVALIMA, 25 Dezembru 2025 (TATOLI)- Padre Pároku Ave Maria Suai, Adérito Vilar Morreira, dehan selebrasaun Natal lori ksolok, pás no dame ba sosiedade liuliu ba sarani katóliku.
“Kosok-oan Jesus moris fó hanoin mai ita, lori grasa ksolok, dame no instrumentu pás ni’an ba ita nia sosiedade. Ho nune’e misa 25 Dezembru ida-ne’e fó hanoin ba ita ne’ebé liuhusi São João hatudu ona mai ita. tanba Maromak nia liafuan reflete mai ita fó morál ba ema tama iha mistériu salvasaun nian loke odamatan hodi hetan salvasaun husi lalehan ne’ebé Maromak depozita ona mai ita hotu”, Padre Pároku Ave Maria Suai , Aderito Vilár Moreira haklaken iha nia omília bainhira prezide misa , iha Igreja Ave Maria Suai, ohin.
Iha Natal ne’e, nia dehan dudu ema no atu transforma ema, tanba ne’e Maromak haruka nia-oan mane hodi hala’o nia misaun no nia kna’ar hodi transforma ema moris hetan ksolok, pás no dame.
Tuir observasaun Jornalista Tatoli nota iha tereñu katak, durante selebrasaun Natal ne’e Polísia Nasionál Timor-Leste Munisípiu Kovalima fó seguransa másimu ba sarani sira bainhira tuir misa iha Igreja Ave Maria Suai.
Jornalista:Celestina Teles
Editór:Florencio Miranda Ximenes
