Komunidade Sana husu autoridade Vikeke kria uma-mahon ba negosiante sira
VIKEKE, 26 Dezembru 2025 (TATOLI)–Reprezentante komunidade Aldeia Sana, Suku Uaitame, Postu Administrativu Uatulari, Munisípiu Vikeke, Danel Pinto, husu Prezidente Autoridade Munisípiu (PAM) Vikeke kria uma-mahon ba negosiante sira iha Sana atu fasilita negosiante sira hala’o sira-nia negósiu.
“Iha aldeia Sana ne’ebé lokaliza iha foho ne’e iha fatin merkadu ne’ebé asesu husi negosiante Ossú no Laisorulai. Tempu bazár sira lori sira-nia produtu fa’an iha merkadu Sana, maibé sira fa’an de’it loro-laran no kuandu tempu udan difikulta negosiante sira fa’an sira-nia sasán. Tan ne’e maami hakarak husu PAM Vikeke kria netik uma ruma hodi negosiante sira fa’an sira-nia produtu iha okos,” Danel Pinto hateten ba TATOLI iha Aldeia Sana, Sesta ne’e.
Nai haktuir merkadu ne’ebé lokaliza iha Aldeia Sana sai sentru ba negosiante sira husi Nahareka (Ossú), Laisorulai husi Baukau, Suku Makadike no Matahoi, maibé dezafiu ne’ebé negosinte sira hasoru mak fasilidade merkadu laiha.
Iha sorin seluk, Xefe Aldeia Sana, Marito Soares hateten bazár ne’ebé iha Aldeia Sana iha kada semana negosiante sira utiliza hodi fa’an produtu lokál, maibé iha tempu udan negosiante sira labele fa’an sasán tanba mohon laiha.
“Ha’u aprezenta ona pedidu ba Programa Nasionál Dezenvolvimentu Suku (PNDS), maibé sira dehan planu merkadu sei tau ba tinan 2026, ne’ebé hein de’it. Merkadu ne’e sai importante tebes ba ita-nia komunidade ne’ebé hela iha área remota hodi uza buka osan sustenta nesesidade família,” nia tenik.
Tuir dadus, populasaun ne’ebé hela iha Aldeia Sana totál uma-kain 120 no totál populasaun 1.000.
Hatán ba preokupasaun ne’e, Prezidente Autoridade Munisípiu Vikeke, Francisco C. S. de Gonzaga Soares hateten kona-ba preokupasaun komunidade Sana ba merkadu ne’e tenke aprezenta ba suku, depois suku lori bá Asembleia Postu Administrativu (ASPA) hodi tau ba planu prioridade.
Nune’e, nia fó-hanoin ba autoridade aldeia no suku sira tenke prepara planu dezenvolvimentu sira-ne’ebé iha baze hodi lori bá ASPA no Konsellu Konsultivu Munisipál (CCM-sigla portugeza) hodi hetan aprovasaun ba planu sira-ne’ebé aprezentadu.
Jornalista: Vitorino Lopes da Costa
Editór: Xisto Freitas da Piedade
