VIKEKE, 26 Dezembru 2025 (TATOLI)–Prezidente Autoridade Munisípiu Vikeke, Francisco C. S. de Gonzaga Soares hateten obra lima husi Programa Integradu Dezenvolvimentu Munisipál (PIDM) ba tinan 2025 iha Munisípiu Vikeke iha progresu atinjimentu.
“Kona-ba obra PIDM ba tinan 2025 ita-nia ezekusaun tarde tanba prosesu aprovizionamentu mak sai tarde,” Francisco hateten ba TATOLI iha ninia kna’ar fatin, Sesta ne’e.
Autoridade ne’e kompromete sei esforsu hodi akompaña obra referida hodi konklui 100%, nune’e daudaun ne’e kontinua orienta empreza responsavel sira hodi aselera serbisu.
“Obra PIDM ba tinan 2025 reabilita merkadu Olobai, irrigasaun Welafua, Maternidade Uatulari, reabilitasaun sentru saúde Uatukarbau. Husi obra sira-ne’e balun atinje 78% ba leten. Nune’e, ita-nia empreza ami sempre sujere atu halo esforsu hasa’e persentajen obra,” nia hato’o.
Tuir dadus, atinjimentu fíziku husi kada obra hanesan reabilitasaun merkadu Olobai gastu $273.951,88, atinje 85.21%, responsabiliza husi empreza Caniela Unipessoal, Lda. Reabilitasaun Sentru Saúde Uatukarbau ba estensaun sala lima no toilet rua, gastu $237.506,10, atinje 52.38%, responsabiliza husi empreza FINLOS Unipessoál, Lda. Projetu konstrusaun uma maternidade Postu Uatulari, gastu $234.693,77, atinje 71.16%, implementa husi empreza Bonnanenia Unipessoál, Lda. Konstrusaun irrigasaun Welafua, gastu $169.620,64, atinje 52.06%, responsabiliza husi empreza Nefcydorje Unipessoál, Lda no reabilitasaun irrigasaun ba natar Futudu-Buanurak, gastu $109.292 02, atinje 74.30%, implementa husi empreza Comter Unipessoál, Lda.
Obra PIDM lima ne’e sei benefísia komunidade hamutuk 66.354, kompostu husi feto 131.996, mane 65.642 no totál uma-kain hamutuk 27.766.
Jornalista: Vitorino Lopes da Costa
Editór: Xisto Freitas da Piedade
