Terra no Propriedade Kovalima notifika kliente ne’ebé seidauk arrenda rai no uma Estadu
KOVALIMA, 27 Dezembru 2025 (TATOLI)–Diresaun Terra no Propriedade Munisípiu Kovalima fó ona notifikasaun ba kliente sira-ne’ebé seidauk arrenda rai no uma Estadu.
Diretór Terra no Propriedade Munisípiu Kovalima, Carlos Caetano informa Terra no propriedade fó-sai notifikasaun ba kliente sira tanba kliente sira la halo arrendamentu ba Estadu hahú kedas iha 2020 to’o 2025.
“Kliente ne’ebé maka uza proprietáriu Estadu maibé la ativu halo arrendamentu ita esforsu hodi fó notifikasaun, nune’e ita kontinua renova sira-nia kontratu arrendamentu ba propriedade Estadu ne’ebé maka sira okupa,” Carlos Caetano relata ba jornalista sira iha Bairru Rempe, Suai, foin lalais ne’e.
Terra no Propriedade hasai notifikasaun hamutuk 47 ne’ebé maka la kumpri arrendamentu.
“Hafoin fó notifikasaun kliente sira mós hahú selu tuir sira-nia kbiit, pagamentu ho fazeadamente,” Carlos haktuir.
Terra no Propriedade Kovalima selebra kontratu arrendatáriu hamutuk 479. Husi númeru ho tipu kontratu arrendatáriu komérsial hamutuk 75 no arrendatáriu sira seluk uza ba rezidénsia.
Ho nune’e, Terra no Propriedade Kovalima selebra kontratu ho nia prazu kontratu arrendamentu tinan tolu hafoin halo revizaun.
Dirijente ne’e fó hanoin ba arrendatáriu ne’ebé maka kontinua la kumpri sira-nia devér, Terra no Propriedade kontinua prepara notifikasaun.
Jornalista: Celestina Teles
Editór: Xisto Freitas da Piedade
