VIKEKE, 29 Dezembru 2025 (TATOLI)—Xefe Suku Bibileo, Postu Administrativu Vikeke Vila, Munisípiu Vikeke, Moises A. D. C. Pinto, husu Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGEADI, I.P.) halo normalizasaun ba mota Bikarin ne’ebé daudaun ne’e fó ameasa ba populasaun Suku Bibileo nia hela-fatin.
“Agora daudaun ne’e mota Bikarin komesa ameasa fali ami-nia komunidade nia hela-fatin inklui mós komunidade parte Suku Bahalaraua’in no Suku Luka. Iha tempu udan komunidade ta’uk la hela iha sira-nia uma, tanba ita haree mota-nia ibun bá fali ona komunidade nia hela-fatin. Tanba ne’e, ami hakarak husu ba IGEADI atu mai normaliza,” Moises ba TATOLI iha Postu Vikeke Vila, Segunda ne’e.
Nia haktuir iha tinan kotuk ekipa IGEADI mai halo uluk normalizasaun, maibé laiha harii morru protesaun ruma iha mota ninian, entaun tempu udan mota boot mota sempre sulin bá komunidade nia hela-fatin.
“Iha tinan kotuk ekipa Ministériu Obra Públika (MOP) mai sukat ona mota Bikarin atu harii morru protesaun, maibé to’o agora ami la rona rezultadu ruma,” Moises informa.
Entretantu, tuir dadus, populasaun ne’ebé hela iha Suku Bikarin hamutuk uma-kain 700 ne’ebé daudaun ne’e mota ameasa sira-nia rezidénsia.
Jornalista: Vitorino Lopes da Costa
Editór: Xisto Freitas da Piedade
