DILI, 29 Dezembru 2025 (TATOLI) – Deputada husi Partidu Kongresu Nasionál Rekonstrusaun Timorense (CNRT), Cedelízia Faria dos Santos, husu timoroan hotu atu valoriza luta-na’in sira.
Iha komemorasaun Loron Eroi Nasionál, ne’ebé monu iha 31 Dezembru, deputadu solisita ba timoroan hotu atu hateke ba kotuk eroi no eroína sira-nia luta ba ukun-an ida-ne’e.
“Tenke valoriza eroi sira-nia luta, liuhusi ita-nia hahalok sira, hamutuk lori nasaun ba oin, ita labele hanoin diferensa polítika, diferensa arte marsiál no ritual”, nia apela.
Tanba sira-nia luta ne’ebé hatudu ida de’it ba libertasaun pátria, nune’e presiza timoroan hotu atu hamutuk lori país ne’e morin di’ak. “Entaun, fó parabéns ba Loron Erói Nasionál no orasaun ba sira ne’ebé Maromak bolu ona, atu ita hamutuk nafatin lori Timor ba oin”, nia dehan.
Deputadu husi Partidu Frente Revolusionária Timor-Leste Independente (FRETILIN), Antoninho Bianco, dehan komemorasaun loron ne’e espesiál ba eroi Nicolau Lobato ne’ebé fó an hodi defende libertasaun pátria.
Deputadu ne’e fó hanoin ba timoroan hotu katak país ninia independénsia ne’e la’ós fó de’it, maibé liuhusi rezultadu eroi no mártir sira hotu. Tanba ne’e, iha tempu ukun-an ida-ne’e tenke haburas nafatin espíritu atu serbisu di’ak ba rai no povu husi órgaun soberania sira no servidór hothotu hodi bele valoriza.
Antes ne’e, Arsebispu Arkidioseze Metropolitana Dili, Don Virgílio Kardeál do Carmo da Silva, SDB, hato’o mensajen katak iha loron importante ne’e konvida timoroan hotu atu halo reflesaun hodi banati tuir prinisípiu lutadór sira-nian.
Lembra katak Governu define data 31 Dezembru nu’udar Loron Eroi Nasionál sira-nian hodi dignifika saudozu Nicolau Lobato nia mate iha kombate Mindelo, Same, iha tinan 1978, no foti loron ne’e hanesan marka ba loron eroi nasionál sira-nian mós.
Notísia relevante: Loron Eroi Nasionál: Don Virgílio husu timoroan banati tuir prinsípiu lutadór sira
Jornalista: Nelson de Sousa
Editora: Maria Auxiliadora
