DILI, 29 Dezembru 2025 (TATOLI)—Governu liuhosi Ministériu Juventude, Desportu, Arte no Kultura (MJDAK), Segunda ne’e, entrega prémiu hodi valoriza atleta timoroan ne’ebé hatudu prestasaun di’ak durante kompete iha kompetisaun Desportu Komunidade Nasaun Sira Lian Portugés (CPLP-sigla portugeza).
MJDAK entrega prémiu no rekoñese eroi desportivu timoroan sira ne’ebé hatudu prestasaun iha jogu CPLP 2025 iha-ne’ebé Timor-Leste sai nu’udár uma-na’in ho totál valór orsamentu rihun $36 hanesan modalidade Taekwondo, Karate-do, Xadrez, Volley Praia, Atletizmu no Ténis.
“Ita hakarak motiva joven sira-ne’ebé iha talentu hodi kontinua treinu no lori naran di’ak Timor-Leste nian bá-oin,” Ministru Juventude, Desportu, Arte no Kultura, Nelyo Isaac Sarmento hateten liuhosi komunikadu imprensa ne’ebé Tatoli asesu.
Governu entrega prémiu ne’e hanesan forma rekoñesimentu ba medalla ne’ebé sira konkista no mós apresiasaun ba servisu maka’as hosi treinadór sira.
Notísia relevante: Jogu CPLP sai oportunidade ba Timor-Leste atu dezenvolve desportu
Tuir dadus ne’ebé TATOLI asesu, orsamentu hamutuk $38.500 oferese ba atleta hamutuk na’in-23 kompostu husi atleta Federasaun Atletizmu Timor-Leste (FATL) iha na’in-haat, Taekwondo na’in-haat, Karate-do haat, Ténis tolu, Volleyboll praia na’in-neen no Xadrez na’in-rua.
Husi totál atleta hirak-ne’e kada atleta simu prémiu orsamentu ho valór diferente husi rihun $1 to’o $2.500 ho kategória tolu hanesan atleta ne’ebé hetan medalla osan-mean simu $2.500, osan-mutin $1. 500 no osan-metan rihun $1.
Entretantu, totál atleta ne’ebé partisipa iha jogu desportu CPLP ba da-XII 2025, husi Timor-Leste hamutuk na’in-52 maihusi modalidade sia hanesan Taekwondo, Futeból, Atletizmu, Basketball, Volleyball, Xadres, Karate-do, Ténis Rai no Para-atletizmu.
Jornalista: Natalino Belo
Editór: Xisto Freitas da Piedade
