DILI, 29 Dezembru 2025 (TATOLI) – Vise-Prezidente Konsellu Nasinál Izlámiku Timor-Leste (KNITL), Abdullah Inácio António Soares, lori komunidade musulmana nia naran hato’o ksolok Natál nian ba sarani katólika Timor-Leste.
Tuir nia, momentu atál importante tebes ba komunidade katólika iha mundu, liuliu Timor-Leste tanba sai hanesan loron ne’ebé kompartilla dame no pás ba kada ema, komunidade husi fuan ba fuan.
Ho selebrasaun Natál ne’e bele halo reflesaun durante tinan ida nian hodi hanoin atu simu tinan foun ne’ebé sei mai.
Esperansa komunidade musulmana iha Timor-Leste maka liuhusi Natál ne’e hothotl, espesialmente sarani katólika hamutuk kria dame domin hodi hein tinan foun ne’ebé sei mai.
“Lori komunidade musulmana nia-naran ami haksolok iha loron santu Natál ne’e, nafatin liuhusi orasaun, espera katak momentu Natál ida-ne’e bele la’o ho haksolok ba ita hotu”, nia hato’o.
Kona-ba fraternidade umana entre líder relijiozu iha Timor-Leste, dezde 2019 estabelese ona Asosiasaun Turizmu Relijiozu Timor-Leste (ATR-TL), hodi relijiaun sira ne’ebé eziste iha Timor-Leste ne’e serbisu hamutuk hala’o misaun hodi dezenvolve fraternidade umana iha país.
“Ami-nia misaun dahuluk mak hahú kedas husi ita-nia independénsia, ita hakarak loke pájina foun aprezenta nafatin ita-nia entidade ka identidade orijinál Timor-Leste, nu’udar feto ho naan, maun-alin. Ida-ne’e mak kontestu loloos definisaun husi fraternidade umana ne’e”, esplika.
Nia subliña katak fraternidade umana ne’e importante tebes tanba Timor-Leste iha nia istória, nomós identidade kulturál ne’ebé orijinál, entaun ida-ne’e tenta atu nafatin haburas fraternidade iha sosiedade nia leet.
Durante ezisténia atividade ne’ebé halo mak loke núkleu iha munisípiu hirak ne’ebé estabele ona ATR-TL no promove obra ka sasán sira ne’ebé tama iha turizmu relijiozu nian.
“Ita hakarak atu aprezenta ba ita-nia komunidade atu iha diferente fatin ne’ebé ba relijiaun nian no públiku nian. Ida-ne’e mak durante ne’e ita aprezenta iha públiku. Ita mós nafatin promove ita-nia misaun liuhusi serbisu hamutuk ho Governu, no halo parseria ho internasionál no nasionál, liuhusi Gabinete Apoiu Sosiedade Sivíl ne’ebé tulun orsamentu ba ita-nia atividade sira”, dehan.
Aleinde ne’e, atividade seluk mak halo orasaun ka reza husi igreja, meskita nomós ba relijiaun sira seluk. Iha mós atividade balun halo hamutuk no kada relijiaun hala’o ninia programa.
Jornalista: Arminda Fonseca
Editora: Maria Auxiliadora
