DILI, 29 Dezembru 2025 (TATOLI)—Polísia Nasionál Timor-Leste (PNTL) liuhusi Komandu Munisípiu Dili hamutuk ho ekipa Forsa Tarefa Konjunta sei intensifika patrullamentu hodi garante seguransa iha ámbitu tinan foun.
“Iha tinan foun 31 kalan ita sei hasa’e tan ita-nia Forsa Operasaun Konjunta liuhusi ita-nia patrullamentu hodi halo prevensaun iha loron 31 kalan. Tanba ita haree Natál iha loron 24 kalan sai hanesan referénsia ida mai iha Polísia para atu prevene fatin sira ne’ebé mak mosu konflitu,” Komandante PNTL Munisípiu Dili, Superintendente Xefe Polísia Orlando Gomes, hato’o ba Jornalista sira iha Sentru Konvensaun Dili (CCD, sigla portugés), Segunda ne’e.
Nia dehan, ekipa Forsa Tarefa Konjunta iha loron 31 Dezembru kalan hahú muda estratejia iha terrenu atu nune’e bele halo prevensaun di’ak liután ba joven sira.
“Ita sei halo Operasaun Konjunta ba joven sira ne’ebé konsumu iha estrada ninin no halo barullu ita sei halo kapturasaun,” nia akresenta.
Notísia relevante : PNTL detein joven 20-resin durante selebrasaun Natál
Ba tinan ne’e, ekipa responsável sei implementa operasaun rigorozu liu tanba nota katak iha tinan rohan ne’e normalmente ema hotu sei festeza, husi tinan tuan ba tinan foun, nune’e presiza asegura seguransa ne’ebé di’ak.
“Tanba ne’e mak ita serbisu ho ita-joven sira hotu, ita-nia Polísiamentu Komunitária ho ita-nia Autoridade Suku sira hamutuk ho ita-nia komunidade ne’ebé envolve iha operasaun ida-ne’e hodi fó suporta Polísia nia serbisu atu nune’e bele garante situasaun seguransa ba loron 31 kalan nomós loron,” nia katak.
Komandante Orlando dehan, parte seguransa sei nafatin hala’o serbisu tanba hafoin misa iha loron 01 Janeiru komunidade sei halo paseiu iha Kristu Rei, Likisá no fatin seluk tan.
“Liuliu ba komunidade ne’ebé paseu iha tasi kapitál Dili, Komandu Munisípiu Dili sei hetan apoia husi Polísia Marrítima, Unidade Espesiál Polísia, Komandu no Ekipa Forsa F-FDTL (FALINTIL-Forsa Defeza Timor-Leste) hodi fó seguransa iha área tasi para iha loron 01 Dezembru seguransa bele hakmatek,” nia tenik.
Komandu Munisípiu Dili mós sei koloka Polísia Tránzitu iha fatin sira ne’ebé komunidade halo paseu iha Kristu Rei no fatin sira seluk atu nune’e bele kontrola movimentu sira.
Komandante Munisípiu Dili fundamenta iha selebrasaun tinan foun 31 Dezembru no dia Janeiru 2026 sei halo pasa revista ba motorizada kanu racing sira.
“Komandu Munisípiu Dili apela ona katak la’ós buat foun ida maibé motorizada sira ne’ebé mak uza kanu racing ita sei halo kamturasaun lori motorista ba detein iha ita-nia Komandu Munisípiu Dili,” nia hato’o.
Polísia mós sei halo pasa revista ba joven sira ne’ebé lanu, uza transporte konsumu alkól hodi ba paseu iha tasi.
“Tránzitu sei auto stop check point hodi evita labele hamosu asidente. Tanba ne’e mak Polísia Tránzitu sira ita sei koloka bainhira joven sira ne’e filafali husi fatin paseu mai fali ita sei halo auto stop ba sira atu kontrola ba motorista sira ne’ebé mak hemu alkól. Karik motorista sira hemu alkól, Polísia sei prende sira-nia motór ka karreta no haruka sei tun husi sira husi sira-nia transporte para atu nune’e labele husik liu hodi prevene asidente fatál sira,” nia informa.
Jornalista : Natalino Costa
Editora : Julia Chatarina
