DILI, 29 Dezembru 2025 (TATOLI)-Sentru Nasionál Lojístika, Institutu Públiku (CLN, I.P, sigla portugés) prevee osan hamutuk millaun $1.500 iha tinan 2026 hodi sosa produtu hare-kulit iha rai-laran.
Prezidente Sentru Nasionál Lojístika, Institutu Públiku (CLN, I.P), António Araújo Soares, hateten iha 2026 ne’e sira sei implementa misaun serbisu tolu mak hanesan sosa produtu lokál, halo intervensaun fós ba merkadu no rezerva asisténsia sosiál.
“Entaun iha tinan oin, CLN tau prioridade sosa produtu lokál liuliu hare-kulit iha rai-laran, maibé tinan ida-ne’e sosa hare-kulit barak liu husi Kovalima no munisípiu sira uitoan-uitoan inklui RAEOA tuir tarjeitu ne’ebé iha tinan ida-ne’e,” Prezidente CLN informa ba jornalista sira iha salaun Lalini Larigutu CNE, Kaikoli, ohin.
Dirijente ne’e hateten, fós nia progresu di’ak tebes hodi atinje hamutuk tonelada 1.400, maibé nia foin atinje 35%, enkuantu husi prosesaun tuir CLN nia hakarak fós hamutuk tonelada rihun haat (4), tanba produsaun iha rai-laran sei hasoru difikuldade barak no liuliu produtu lokál, entaun labele másimu ba okaziaun sira-ne’e.
“Hahú husi fulan-Janeiru to’o Setembru, Governu halo intervensaun fós nia folin to’o postu administrativu sira ho presu tuir Diresaun Jerál Estátistika no nia inflasaun tun 5%, ne’ebé hatudu sinál normál no di’ak ba populasaun sira,” nia relata.
Governu rezerva fós iha armajen bainhira ema sira presiza foin halo intervensaun ba sira-nia fatin, maibé fos barak mak mai husi setór privadu sira iha rai-laran.
Nune’e, nia dehan, Governu iha dever tomak hodi responsabiliza atu sosa produtu lokál iha rai-laran, halo intervensaun ba merkadu no rezerva asisténsia sosiál.
“Kona-ba fós sira-ne’ebé sosa husi rai-li’ur, ita seidauk kalkula loloos ninia kustu tanba buat hotu depende ba kualidade fós nian,” nia esplika.
Jornalista : Alexandra da Costa
Editór : Cancio Ximenes
