DILI, 30 Dezembru 2025 (TATOLI)–Polísia Nasionál Timor-Leste (PNTL) sei blokeia estrada Palásiu Prezidente to’o Rotunda Estátua Saudozu Prezidente Nicolau Lobato, Komoro iha ámbitu selebrasaun loron eroi nasionál.
“Relasiona ho selebrasaun loron eroi nasionál iha loron 31 Dezembru 2025, Polísia Nasionál Timor-Leste sei taka dalan públiku temporáriu, husi Palásiu Prezidente Aitarak-laran to’o Rotunda Estátua Saudozu Prezidente Nicolau Lobato, Komoro,” Portavós Komandu Jerál PNTL, Superintendente Polísia João Belo dos Reis, hateten liuhusi konferénsia imprensa ne’ebé hala’o iha Komandu Jerál PNTL, Kaikoli, Tersa ne’e.
Notísia relevante : Loron Eroi Nasionál: Don Virgílio husu timoroan banati tuir prinsípiu lutadór sira
Nia dehan, sidadaun sira ne’ebé utiliza transporte karreta ho motorizada, bainhira liu iha dalan prinsipál husi área Palásiu Prezidente to’o iha Rotunda Komoro sei taka tanba atividade marsa ba pás sei la’o ain hahú husi tuku 06:00 dadeer to’o serimónia ramata tuku 10:00, hafoin bele asesu fali dalan iha área referidu.
“PNTL husu ba utilizadór dalan sira atu uza dalan alternativu ne’ebé disponível, tuir instrusaun husi ofisiál seguransa iha fatin, tanba seguransa vida prioritiza ba ita-boot sira-nia an ho utilizadór sira seluk,” nia fó hanoin.
Jornalista : Natalino Costa
Editora : Julia Chatarina
