Embaixada Thailandia apoiu nesesidade bázika ba Palásiu Prezidensiál hodi tulun komunidade
DILI, 30 Dezembru 2025 (TATOLI)–Embaixada Thailandia iha Timor-Leste apoia nesesidade bázika ba Palásiu Prezidensiál hodi tulun komunidade iha área rurál.
Doasaun ne’ebé ofrese husi Embaixadór Atipat Rojanapaibulya no nian kaben ne’ebé simu direta husi Xefe Kaza Sivíl Palásiu Prezidensiál, Jesuína Maria Ferreira Gomes.
Doasaun ne’ebé Embaixada Thailandia fó mak hanesan foos kilograma 20 iha saka 10, mina-tein litru haat (4) hamutuk jerigen 10 no ekipamentu ijiene nian hanesan sabaun hariis kaixa ida (1), pastadente kaixa ida (1), Eskova nehan kaixa ida (1) no Detergente rahun kaixa rua (2).
Jestu ne’e parte husi parseira naruk ida-ne’ebé ho objetivu atu fó apoiu umanitáriu ba sidadaun sira-ne’ebé vulnerável liu iha territóriu laran tomak.
Item sira-ne’ebé apoiu ne’e sei distribui liu husi programa sosiál sira Prezidénsia Repúblika nian, ne’ebé sei jere husi Unidade Servisu Sosiedade Sivíl no Asuntu Sosiál (SSSAS), ho objetivu atu hatan ba pedidu urjente sira husi komunidade.
“Ida-ne’e bele ajuda tebes ema sira-ne’ebé presiza, hanesan orfonatu sira no komunidade ne’ebé presiza nesesidade bázika, uitoan ka barak ita bele ajuda ona ita-nia maluk sira ne’ebé presiza tebes,” Jesuína Gomes hateten iha Kantina Matak Palásiu Prezidensiál, Dili, ohin.
Xefe Kaza Sivil elojia mós kompromisu kontínua husi Embaixada Reál Tailandia, hodi nota katak sira-nia apoiu ne’e la’ós de’it durante períodu festivu maibé mós inklui projetu umanitáriu oioin durante tinan tomak.
Nia reafirma katak, unidade servisu sosiál Prezidénsia nian sei garante distribuisaun ne’ebé lalais no transparante ba sasán sira-ne’e.
Hodi diresiona inisiativa sira-ne’e ba sidadun sira-ne’ebé rekursu menus, Prezidénsia Repúblika buka atu garante katak espiritu Natál bele transforma ba apoiu konkretu no aliviu loos ba família sira-ne’ebé hasoru susar.
Jornalista : Hortencio Sanchez
Editór : Cancio Ximenes
