Estudante husi Biblioteka Infantíl fó supreza ba Xefe Estadu
DILI, 30 Dezembru 2025 (TATOLI)–Estudante Biblioteka Infantíl ne’ebé akompaiña husi Funsionariu sira iha Palásiu Prezidensiál fó surpreza ba Prezidente Repúblika, José Ramos-Horta ne’ebé kompleta ona nia aniversáriu ba da-76.
Supreza ne’e, Estudante no funsionariu sira fó ba Xefe Estadu Ramos-Horta iha Salaun ASEAN Palásiu Prezidensiál Dili, ohin.
Iha entrevista hafoin selebrasaun ne’e, Prezidente dedika loron importante ne’e ba sidadaun sira-ne’ebé vulnerável liu iha nasaun ne’e, no reafirma fali ninia kompromisu atu garante katak benefísiu husi progresu nasionál to’o ba sira-ne’ebé presiza liu.
“Agradese tebes ba Estudante no funsionariu sira-ne’ebé fó ona supreza mai ha’u, hakuak boot ba imi hotu,” Ramos-Horta hateten.
Antes ramata, Prezidente Repúblika husu ba foin-sa’e Timoroan sira atu mantein estabilidade nasionál, hodi fó hanoin ba sira katak sira-nia responsabilidade no unidade mak sai hanesan baze ba prosperidade Timor-Leste nian iha futuru.
Ho nune’e, atu simu tinan foun ne’ebé mai, Xefe Estadu husu ba sidadaun hotu atu mantein pás no estabilidade iha nasaun ne’e atu simu tinan foun ho domin.
Jornalista : Hortencio Sanchez
Editor : Cancio Ximenes
