DILI, 30 Dezembru 2025 (TATOLI)-Komisaun C trata Asuntu Finansa Públika iha Parlamentu Nasionál rekomenda ba liña ministeriál no entidade públiku sira atu ezekuta Orsamentu Jerál Estadu (OJE) 2026 tuir programa no planu ne’ebé iha.
Prezidente Komisaun C, Cedelízia Faria dos Santos, apresia Governu tanba rona rekomendasaun komisaun nian hodi aprova ona dekretu ezekusaun OJE 2026 ne’ebé hetan ona promulgasaun husi Prezidente Repúblika, José Ramos-Horta.
Nune’e, ezekusaun bele tama vigór iha 01 Janeiru 2026, tanba iha tinan liubá iha Fevereiru to’o Marsu mak dekretu ezekusaun sai, entaun fó impaktu ba ezekusaun.
“Rekomendasaun ba Governu, halo orsamentu pur programa, entaun haree ita-nia reseita interna rasik, Fundu Petrolífeiru ne’ebé ita hotu preokupa. Husu ba Governu tenke ezekuta orsamentu ne’e ho di’ak, tuir Programa Governu Dasiak no planu anuál ne’ebé iha’’, nia sujere.
Nia solisita mós atu halo poupansa ba despeza ne’ebé laiha nesesidade no importante haree liu ba povu nia moris. “Karik, orsamentu ne’ebé balun iha programa nia laran, maibé laiha nesesidade di’ak liu ita lalika ezekuta, ezemplu ba viajen estranjeiru, se presiza liuhusi zoom meeting de’it la presiza bá direita”, nia rekomenda.
Lembra katak, 21 Novembru, Parlamentu Nasionál liuhusi reuniaun plenária estraordinária aprova ona proposta OJE tinan fiskál 2026 ho montante $2.214.689,195 iha finál globál.
Orsamentu ne’e aloka ba saláriu no vensimentu $476.870.249, bens no serbisu $447.904.446, transferénsia públika $820.710.160, kapitál menór $32.556,96, no kapitál dezenvolvimentu $436.647.379.
Notísia relevante: https://tatoli.tl/2025/11/21/pn-aprova-proposta-oje-2026-iha-final-global/
Jornalista: Nelson de Sousa
Editora: Maria Auxiliadora
