DILI, 30 Dezembru 2025 (TATOLI)-Prezidente Komisaun E iha Parlamentu Nasionál ne’ebé Trata Asuntu Infraestrutura, Marcos Xavier, rekomenda ba Governu atu kapasita emprezáriu timoroan sira hodi partisipa iha obra konstrusaun infraestrutura hodi kompete ho emprezáriu estranjeiru.
Nia dehan importante atu kapasita emprezáriu timoroan sira ne’ebé iha kbiit atu ka’er obra ne’ebé ho orsamentu boot, nune’e bele kompete ho emprezáriu sira husi rai-li’ur, tanba país tama ona iha Asosiasaun Nasaun Sudeste Aziátiku (ASEAN, sigla inglés).
“Ita fó ba timoroan sira, osan ne’e sei hela iha Timór. Ba emprezáriu estranjeiru osan sei sai hotu. Nune’e, husu timoroan sira tuir konkursu, haree sira-nia kapasidade rekursu no finanseira bele hetan oportunidade’’, dehan.
Deputadu ne’e observa katak durante ne’e emprezáriu timoroan barak hetan oportunidade ka’er obra boot sira, nune’e presiza kapasitasaun hodi iha oportunidade no garante kualidade obra.
Jornalista: Nelson de Sousa
Editora: Maria Auxiliadora
