DILI, 30 Dezembru 2025 (TATOLI)-Prezidente Komisaun E ba Asuntu Infraestrutura iha Parlamentu Nasionál, Marcos Xavier, sujere ba Diresaun Nasionál Transporte Terrestre (DNTT) atu tau sinál tránzitu iha área risku ba asidente tráfegu iha territóriu.
Nia preokupa tanba durante iha tempu natál ne’e mosu asidente tráfegu barak iha parte leste, liuliu iha Baukau no fatin seluk tan ne’ebé rezulta mós sidadaun balun lakon vida.
Nune’e nesesita duni instala sinál tránzitu hodi fó atensaun ba movimentu transporte sira. “Tenke tau sinál sira iha estrada, uluk estrada aat asidente uitoan de’it, maibé agora estrada di’ak asidente barak, tanba laiha sinál ida iha estrada”, nia hato’o.
Iha parte seluk, deputadu ne’e husu ba DNTT atu emite karta kondusaun ho kuidadu, nune’e bainhira kondús transporte ne’e hatene. “Maibé, fila mós ba konxiénsia motorista atu bainhira kondús ho kuidadu no velosidade normál”, nia apela.
Antes ne’e, deputadu husi Partidu Kongresu Nasionál Rekonstrusaun Timorense (CNRT), Mateus da Cruz, apela ba motorista sira presiza kontrola kondisaun veíkulu molok halo movimentasaun hodi bele prevene asidente tráfegu, liuliu iha tempu udan.
Nia husu ba parte Polísia Unidade Tránzitu no DNTT atu reforsa kontrolu movimentasaun transporte públiku iha loron Natál no tinan foun no solisita mós ba motorista sira atu presta atensaun ba kondisaun viatura, nomós ba motorista sira atu kondús ho velosidade normál tanba tempu udan no halo rai namdoras.
Jornalista: Nelson de Sousa
Editora: Maria Auxiliadora
