Konstrusaun irrigasaun Uelafua no Buanurak besik konkluidu

VIKEKE, 30 Dezembru 2025 (TATOLI)—Diretór Servisu Agrikultura Munisípiu Vikeke, Olívio Soares Freitas informa progresu konstrusaun irrigasaun Uelafua iha Postu Lakluta no irrigasaun Buanurak iha Postu Ossú besik konkluidu.

“Iha tinan 2025 ne’e ita hetan obra konstrusaun irrigasaun rua husi Programa Dezenvolvimentu Integradu Munisipál (PDIM) Vikeke ne’ebé konstrui irrigasaun Uelafua iha Postu Lakluta. Natar ne’ebá irrigasaun aat kuaze tinan barak, inklui parte Buanurak. Husi irrigasaun rua ne’e daudaun ne’e besik konkui ona,” Olívio Soares Freitas ba TATOLI iha Postu Vikeke Vila, Tersa ne’e.

Olívio dehan irrigasaun Uelafua Lakluta benefísia natar ektare 25 no natar Futudu área Buanurak Postu Ossu purvolta ektare 100-resin ne’ebé durante ne’e abandonadu durante tinan 11 tanba irrigasaun aat.

“Nune’e, konstrusaun irrigasaun ne’e ita sei konklui iha tinan ida-ne’e. Tinan 2026 agrikultór sira bele halo halo filafali sira-nia natar sira-ne’e. Natar Uelafua sei benifísia populasaun hamutuk 6.695 ho totál uma-kain hamutuk rihun 1.496. Enkuantu, irrigasaun Futudu benefísia populasaun hamutuk 18.787 ho totál uma-kain 3.857,” nia relata.

Olívia esplika reabilitasaun irrigasaun natar Futudu Buanurak gastu $109.292,02, implementa husi empreza Nefcydorje Unipessoal, Lda no konstrusaun irrigasaun Uelafua gastu $169.620,64.

Aleinde ne’e, nia dehan, iha tinan 2025 ne’e hetan mós projetu nasionál husi Ministériu Agrikultura, Peska, Pekuária no Floresta (MAPPF) konstrui irrigasaun Irabere ne’ebé ita lansa iha 22 Setembru. Obra referida konstrui husi empreza Xineza ida ho naran Chingquing ho orsamentu $10.714.858,26. Sistema irrigasaun ne’e ho naruk kilómetru 9,2, ne’ebé sei fornese ba natar ektare 468, durasaun konstrusaun sei ramata iha 2027.

Bainhira obra ne’e konkluidu sei banefísia natar ektare 118 iha Postu Uatukarbau no ektare 350 iha parte Iliomar, Munisípiu Lautein.

Jornalista: Vitorino Lopes da Costa

Editór: Xisto Freitas da Piedade