DILI, 30 Dezembru 2025 (TATOLI)-Komisaun C trata Asuntu Finansa Públika iha Parlamentu Nasionál hakarak prioriza diskusaun ba Impostu sobre Valór Akrexentadu (IVA) iha tinan 2026.
Prezidente Komisaun C, Cedelízia Faria dos Santos, dehan lejislasaun referida iha prosesu no komisaun halo hela koordenasaun ho Ministériu Finansa hodi bele haree iha tinan oin.
“Tuir projesaun, iha 2027 mak [Ministériu Finansa] bele lori mai, maibé ami Komisaun ladún konkorda ida-ne’e, tanba ita tama ona ASEAN tenke haree”, nia afirma.
Nune’e, lejislasaun ne’e presiza halo análize kle’an, haree situasaun iha rai-laran, tanba bainhira lei ne’e vigora mak sei aplika taxa oioin ba sidadaun sira, maibé haree ba saláriu mínimu traballadór ne’ebé daudaun ki’ik no nesesidade povu nian hodi labele iha impaktu.
“Ita labele ba kópia de’it lei husi nasaun seluk nian mai, maibé tenke halo anélize lai. Ami parese aprova lei IVA ne’e, maibé esesaun ida nesesidade bázika povu ki’ik nian labele tau taxa”, dehan.
Antes ne’e, Vise-Ministra Finansa, Felícia Claudinanda Cruz Carvalho, hateten ministériu fó prioridade atu aumenta kolesaun reseita doméstika iha Orsamentu Jerál Estadu (OJE) 2026. Esforsu atu hasa’e reseita mak dahuluk haree ba kapasidade institusionál, liuliu iha sistema, rekursu umanu no lei.
Governu kontinua prepara Autoridade Tributária no Aduaneira atu administra lei IVA iha tinan 2027 hanesan parte ida prinsipál ba mobilizasaun reseita doméstika ne’ebé espera atu kontribui 1,5% husi Produtu Internu Brutu (PIB).
Notísia relevante: MF kontinua prioriza aumentu reseita doméstika iha OJE 2026
Jornalista: Nelson de Sousa
Editora: Maria Auxiliadora
