Ramos-Horta apoia Governu tanba hala’o dezenvolvimentu kontinua la’o ba oin
DILI, 30 Dezembru 2025 (TATOLI)–Prezidente Repúblika, José Ramos-Horta, hateten fó apoiu másimu ba Governu Konstitusionál da-sia (IX) ne’ebé lidera husi Kay Rala Xanana Gusmão tanba hala’o dezenvolvimentu maka’as tebes no kontinua ba oin.
“Ha’u fó ha’u-nia apoiu tomak ba Governu ne’ebé lidera husi Primeiru-Ministru Xanana Gusmão, Governu ida-ne’ebé sensivel ba dezafiu sira-ne’ebé ita-nia povu hasoru,” Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite, ohin.
Tuir observasaun husi Xefe Estadu katak, Governu Konstitusionál da-sia atu aselera projetu sira hanesan modernizasaun Aeroportu Internasionál Nicolau Lobato no hadi’a konektividade nasionál liuhusi fibra ótika submarina.
Prezidente mós fó énfaze ba nesesidade atu iha jestaun di’ak liután ba servisu públiku nian, hodi husu EDTL atu responsabiliza ba estragu sira-ne’ebé mosu tanba eletrisidade ne’ebé la-estável.
Prezidente mós foti kestaun kona-ba ajenda diplomátika ne’ebé okupadu ba tinan oin, inklui vizita ne’ebé hein hela husi Primeiru-Ministru Austrália nian no hametin liután relasaun sira iha rejiaun ASEAN laran.
Jornalista : Hortencio Sanchez
Editor : Canxio Ximenes
