DILI, 30 Dezembru 2025 (TATOLI)–Tribunál Judisiál Primeira Instánsia Dili (TJPID), Tersa ne’e, halo audiénsia julgamentu ba arguidu VCB no CPS ne’ebé envolve iha krime foti subar motorizada iha área Manleuana iha tinan 2024.
Audiénsia julgamentu ne’e prezide husi Juíz Koletivu Julmira Auxiliadora, Argentino Nunes, no Ivan Patrocínio.
Nune’e, iha liuhusi julgamentu ne’e deside aplika pena prizaun tinan-tolu no suspende ba tinan-tolu ba arguidu VCB no CPS tanba faktu provadu katak arguidu sira envolve krime ne’ebé Ministeriu Públiku (MP) imputa ba sira.
Notísia relevante : Tribunál aplika Prizaun Preventiva ba RLdCG ne’ebé envolve iha grupu foti subar telefone
Razaun Tribunál aplika pena prizaun ne’e tanba bazeia ba depoimentu husi ofendida no sasin sira ne’ebé sustenta durante prosesu julgamentu ba kazu ne’e la’o.
Akuzaun
Tuir akuzaun katak arguidu VCB hamutuk ho nia kolega foti subar ofendida SdS nia motorizada ho marka Honda Beat, ho xapa matríkula W.8645 ne’ebé lakon iha Merkadu Manleuana iha loron 24/12/2024 iha oras tuku 14:00.
Arguidu CPS mak foti ofendidu nia motorizada Mio Beat ho xapa matríkula U.8043 lakon iha Laklubar-Manatutu iha loron 21/02/2024, ofendidu nia motorizada hetan fali ho kondisaun a’at totál tanba lakon durante tinan-ida no hetan fali iha Fevereiru 2025 iha Polísia Eskuadra Bekora.
Arguidu VCB hamutuk ho nia kolega ho inisiál Z ho hanoin ida bá Merkadu Manleuana hodi foti ofendida nia motorizada, tanba ne’e mak motorizada referidu para iha VCB nia uma durante loron-rua no ba troka fali iha Hera ho motorizadas seluk.
Arguidu CPS mak foti ofendidu nia motorizada iha Laklubar Manatutu ho razaun ida katak, motorizada ne’ebé mak sosa nunka atu sobu estraga kuandu sosa ho osan rasik maski hanesan sasán uzadu.
Tanba ne’e, MOP redús akuzasaun hasoru arguidu VCB no CPS mai TJPID tanba iha duni indísiu sufisiente katak arguidu sira hanesan autór ba materiál ba prátika krime ida furtu agravadu ho forma konsumadu previstu no punidu tuir art. 252° n.º 1 aln.b) d) no 1) ho nia modura penál tinan-rua to’o tinan-ualu iha prizaun.
Rekorda fali katak, Arguidu VCB antes ne’e kumpre hela medida Prizaun Preventiva iha Bekora durante fulan-10 resin ona.
Jornalista : Natalino Costa
Editora : Julia Chatarina
