VIKEKE, 31 Dezembru 2025 (TATOLI)–Autoridade Postu Administrativu Uatulari hamutuk ho veteranu sira selebra Loron Eroi Nasionál ba da-VIII Ho misa hodi hanoin hikas eroi sira-ne’ebé fó sira-nia aan ba luta libertasaun nasionál.
Iha selebrasaun ne’e, Amu Selebrante, Pe. Heriberto Soares Pedro, SVD, hateten istória ne’e sai hanesan marka kanek ida, kanek iha nian fitar, fitar ne’e sai sinál ida mak símbolu Repúblika Demokrátika Timor-Leste ( RDTL).
“Ohin ita hotu-hotu halibur malu hodi selebra Loron Eroi Nasionál, iha figura prinsipál ida mak ita hotu-hotu hanoin filafali mak Saudozu Nicolau dos Reis Lobato, atu lori ita hotu-hotu hodi halo reflesaun iha momentu ida-ne’e,” Pe. Heriberto Soares Pedro hateten iha ámbita misa selebrasaun Loron Eroi Nasionál iha uma-mahon, resintu Administrasaun Uatulari, Kuarta ne’e.
Iha loron 31 Dezembru 1978, nia haktuir, Saudozu Nicolau hasoru imbuskada husi forsa militár Indonézia nune’e saudozu Nicolau mate iha batalla laran, to’o ohin loron saudozu ninia mate-isin ladauk hatene haloot iha fatin ne’ebé.
“Hanesan jerasaun foun ida hakarak aprende istória hodi partilla ba foin-sa’e sira seluk, atubele hatene istória la barak, maibé hatene netik uitoan hodi hatene saida mak akontese iha tempu pasadu. Ita-nia eroi sira hamriik metin iha rai nia leten hodi defende nia povu no nia rai. Ida-ne’e mak ita hanaran eroi ka saudozu,” nia haklaken.
Amu esplika Saudozu Nicolau fó nia aan ba mate, maibé realidade hatudu katak espíritu ne’ebé Saudozu Nicolau halo sai mós espíritu ba eroi no eroina sira seluk.
“Ikus mai ita konsege kore ita-aan husi invazór sira, ita hamriik liberta ita-nia povu no ita-nia soberania,” nia hato’o.
Nia husu sarani sira nafatin valoriza prinsípiu luta ne’ebé mak eroi sira husik hela nu’udár fitar ida.
Iha fatin hanesan, Reprezentante Prezidente Konsellu Veteranu Munisípiu Vikeke, Daniel Sarmento ‘Fugeti’, informa loron 31 Dezembru sai loron nasionál ida ba eroi sira-nian, tanba ne’e Munisípiu Vikeke selebra iha nivel munisípiu iha Postu Uatulari.
“Selebrasaun loron eroi ne’e ba ita-nia eroi sira-ne’ebé mate iha fatin ne’ebé de’it. Ho sira-nia loron mak ita ohin selebrasaun ida-ne’e atu ita hanoin hikas ba ita-nia eroi sira-ne’ebé mate iha funu laran,” nia subliña.
Iha fatin hanesan, Administradór Postu Uatulari, Jorge Ribeiro hateten selebrasaun loron nasionál ba eroi sira-ne’e sai loron importante hodi relembra fali eroi sira-ne’ebé lakon vida iha funu.
“Tan ne’e, ita ohin hamutuk hodi selebra misa no kari ai-funan no lilin ba ita-nia eroi sira iha iha krúz boot iha postu ne’e,” nia tenik.
Selebrasaun Loron Eroi Nasional ne’e hetan apoia finanseira husi Ministériu Asuntu Kombatente Libertasaun Nasionál (MAKLN) hamutuk $2.500.
Hafoin misa ramata, autoridade, veteranu, família eroi no komunidade kontinua lori ai-funan ba kari iha krúz boot iha uma-mahon Uatulari.
Partisipa iha misa selebrasaun ba eventu ne’e kompostu husi Administradór Postu Ossú, Autoridade Uatulari, reprezentante Komandante Polísia Nasionál Timor-Leste (PNTL) Munisípiu Vikeke, veteranu, família eroi sira no komunidade.
Jornalista: Vitorino Lopes da Costa
Editór: Xisto Freitas da Piedade
