Don Norberto: “Husik buat aat iha kotuk, hametin buat di’ak iha tinan foun”
BOBONARU, 31 Dezembru 2025 (TATOLI) – Bispu Dioseze Maliana, Don Norberto do Amaral, konvida sarani katólika hotu atu halo reflesaun kle’an kona-ba moris durante tinan 2025 no prepara an hodi simu tinan foun ho fuan ne’ebé hafoun iha Maromak nia domin.
Bispu Norberto hato’o mensajen ne’e iha nia omília iha misa agradesimentu tinan 2025 ne’ebé hala’o iha igreja Pró-Katedrál Maliana, ohin.
Iha atmosfera kontemplativa, amu-lulik ne’e fó hanoin ba sarani sira katak viajen moris ema nian nakonu ho esperiénsia di’ak no aat ne’ebé presiza rekoñese no aborda ho matenek.
“Hein katak ita tama didi’ak ba tinan foun ida-ne’e, husik tinan tuan lori ba buat ne’ebé aat, di’ak ne’e ita hametin nafatin hodi ba oin, nune’e ita bele sai di’ak nu’udar Maromak nia oan loloos”, nia hato’o.
Hodi subliña katak ema nia moris iha limitasaun, tanba ne’e, ema hotu hetan konvite atu avalia filafali se sira-nia moris tuir Maromak nia domin no hakarak ka la’e.
Bispu Dioseze Maliana ne’e argumenta katak tinan foun nu’udar oportunidade atu abandona toman aat sira no hametin buat di’ak sira ne’ebé hala’o tiha ona.
“Se ema realiza sira-nia sala no prontu atu filafali ba Maromak nia dalan, moris diʼak sei nakloke iha futuru”, katak.
Iha omília, Don Norberto mós fó atensaun espesiál ba jerasaun foun sira atu labele monu ba lasu uza telemovel ne’ebé demaziadu, ne’ebé bele estraga sira-nia kualidade moris, relasaun sosiál, no futuru.
“Joven sira tenke aprende moris ho moderadu, labele depende liu ba telefone sira, maski bainhira la’o ka hala’o atividade importante sira”, nia hateten.
Bibi-atan ne’e mós husu ba inan-aman sira atu preokupa liu ba oan sira-nia edukasaun, nune’e sira labele uza sala sira-nia liberdade.
Hodi hakotu ninia mensajen, Don Norberto hato’o ninia esperansa atu sarani sira tama tinan foun ho entuziasmu, husik hela aspetu negativu hotu husi tinan kotuk no hametin nafatin di’ak atu sira bele moris nu’udar Maromak nia oan loloos.
“Mai ita hotu tama tinan foun ho di’ak no moris tuir Maromak nia domin”, nia konklui.
Notísiarelevante: Don Norberto enserra Tinan Jubileu Esperansa 2025 ho mensajen Komuñaun, Partisipasaun no Misaun
Jornalista: Sergio da Cruz
Editora: Maria Auxiliadora
