Tinan foun lori sarani sira konsiente Jesus nia prezensa iha mundu
BOBONARU, 01 Janeiru 2026 (TATOLI)—Pároku Igreja Santu António Balibo, Arum Eka, husu sarani sira iha selebrasaun tinan foun ne’e lori sarani sira konsiente prezensa Jesus nian iha mundu.
Nia hateten, loron ohin selebra festa Virjen Santa Maria Maromak nia inan hanesan tempu ne’ebé santa Maria hanoin tebe-tebes nia oan, signifika prezensa Maromak nian iha ida-idak nia leet, maske tinan sempre troka maibé fiar ba maromak nafatin iha.
“Tanba Kristu mai lori dame ba ema hotu iha mundu ne’e, nune’e ema hotu tenke hadomi malu, respeita malu iha uma no mós iha sosiedade nia laran,” Pároku Igreja Santu António Balibo, Arum Eka hateten iha omília bainhira preside misa iha Parokia St. antónio Balibo, ohin.
Nia hein katak selebrasaun tinan foun bele refleta ema hotu nia moris, haluha asaun negativu sira iha pasadu no koko hadi’a iha futurua, lori Maromk nia prezensa iha moris tomak.
Entretantu tuir observasaun iha terenu katak komunidade festeza tinan foun ho hakmatek no parte seguransa liuliu Polisia Nasionál Timor-Leste (PNTL) sempre halo patrullamentu hodi kontrola situasaun iha suku Balibu.
Jornalista : Alexandra da Costa
Editór : Cancio Ximenes
