Amu Papa husu mundu tomak kria dame lahó arma
DILI, 02 Janeiru 2026 (TATOLI) – Amu Papa Leão XIV hateten katak dame loloos maka dame ne’ebé lahó kilat maibé fiar ne’ebé ninia abut metin iha Maromak no sai responsabilidade ema ida-idak nian kria dame iha mundu.
Afirmasaun ne’e hato’o durante saudasaun Angelus iha komemorasaun Loron Mundiál Dame 2026, ne’ebé hala’o iha Prasa São Pedro, Sidade Vatikanu, kinta (01 Janeiru).
Tuir Vatican News, ne’ebé Tatoli asesa katak, loron mundiál ba dame ne’e rasik maizumenus ema rihun 40 maka tuir liuhusi orasaun Angelus, ne’ebé marka mós diskursu públiku dahuluk hosi Papa Leão XIV iha tinan ne’e.
“Iha ninia mensajen, Amu-Papa husu ema iha mundu tomak liuliu tinan foun ne’e ho kompromisu konkretu ida atu harii dame mundiál, hahú ho dezarma ita-nia fuan sira no hadook-an hosi forma hotu violénsia nian,” Amu Papa hateten.
Iha biban ne’e Amu-Papa hato’o nia dezeju sinseru ba dame no di’ak ba ema hotu, enkuantu hato’o saudasaun espesiál no orasaun ba Prezidente Repúblika Italiana, Sergio Mattarella.
Hafoin resitasaun Angelus nian, Papa Leão XIV fó hanoin katak durante tinan 58, ho inisiativa Papa Saun Paulo VI nian iha tinan 1968, loron 01 Janeiru selebra nu’udar Loron Mundiál Dame nian. Nia mós hanoin hikas kumprimentu ne’ebé nia hato’o iha nia eleisaun dahuluk nu’udar Amu-Papa, tuir Maromak nia inspirasaun: “Dame ba imi hotu.”
Tuir Amu-Papa, dame loos la’ós rezultadu forsa armada nian, maibé prezente domin inkondisionál Maromak nian, konfiansa ida ne’ebé entrega ba responsabilidade ema ida-idak nian. Ho konsiénsia ida-ne’e, Amu-Papa konvida ema hotu, ho Kristu nia grasa, atu hahú ohin ba oin harii tinan dame nian.
Nia mós rekoñese katak atu hakotu violénsia individu no organizasaun barak iha mundu tomak dedika ona sira-nia an hodi hakotu violénsia no harii dame liuhosi inisiativa konkreta oioin.
Amu-Papa mós destaka marxa nasionál dame nian ne’ebé hala’o iha loron 31 fulan-Dezembru nian iha Catania, Itália, nune’e mós marxa dame nian ne’ebé sei mai ne’ebé organiza husi Komunidade Sant’Egidio.
Iha okaziaun ne’ebá, Papa Leão XIV kumprimenta mós estudante no profesór sira husi Richland, Nova Jersey, Estadu Unida Amérika, ne’ebé tuir enkontru orasaun Angelus.
Hodi hakotu nia saudasaun Angelus, Papa Leão XIV hanoin hikas fali tinan 800 Saun Francisco de Assis nia mate.
Nia oferese santu nia bensaun, foti husi Sagrada Eskritura, no harohan atu Maromak haraik bensaun no proteje ninia povu no haraik dame ba sira. Amu-Papa mós hein katak Maria, Maromak nia inan, sei kontinua orienta umanidade iha viajen tomak tinan foun nian.
Jornalista : Arminda Fonseca
Editór: Evaristo Soares Martins
