BOBONARU, 02 Janeiru 2026 (TATOLI)—Inspetór Polísia Komandante Eskuadra Balibo, Ernesto Martins, informa Polísia Nasionál Timor-Leste (PNTL) eskuandra Balibo kaptura joven na’in-hitu ho inisia M, A, A, E, E, J, K, ne’ebé komete konflitu komunitária iha Suku Balibo, Postu Administrativu Balibo, Munisípiu Bobonaru.
Akontesementu ne’e akontese bainhira grupu juventude sira husi parte villa nian halo atake ba joven sira husi bairu Berame iha fatin públiku iha bairru merkadu villa nian, hafoin sira fila husi tasi Palaka ba uma.
“Situasaun sira-ne’e akontese tanba suspeitu sira konsumu alkol domina ona, nune’e la kontroladu hodi halo asaltu asaun fízika ba lezada, hadau xave motor, provoka malu hodi hamosu tuda malu ho fatuk ba lezada sira. Ida-ne’e la’ós kestaun arte marsiál ruma ka ódiu individu. Tanba durante ne’e, tuir ha’u-nia haree, joven sira iha ne’e unidade tebes tanba ligasaun família. Karik sira konsumu ona alkol foin buka problema ba malu, entaun kauza loloos iha prosesu investigasaun foin bele deteta loloos,” Inspetór Polísia Komandante Eskuadra Balibo, Ernesto Martins, informa ba Agência Tatoli iha nia kna’ar fatin, Balibo, ohin.
Komandante ne’e dehan, iha komandu nia desizaun katak labele abitua ho asaun sira-ne’ebé joven sira halo maibé tenke loke prosesu investigasaun ne’ebé profundu hodi hetan informasaun adekuadu antes submete ba MP, atu halo prosesu kontinuasaun katak sé mak loos no sé mak sala, PNTL fasilita de’it seguransa no investigasaun.
iha problema ne’e, parte seguransa identifika suspeitu na’in-neen (6) ne’ebé envolve direta konfrontu ne’e, iha biban ne’e kedas seguransa halo atuasaun emerjénsia ba fatin akontesementu hodi hakalma situasaun, akompaña lezada sira halo movimentu to’o ida-idak nia fatin no foti kedas informasaun husi lezada sira.
“Iha biban ne’e kedas, kalan ne’e, ami deteta kaptura kedas suspeitu na’in-ida ho inisiál J hodi sai hanesan informasaun xave atu deskobre asaun sira-ne’ebé akontese iha terrenu. Maibé tamba nia mós ho kondisaun lanu no labele komunika ho di’ak, entaun ami hatama kedas nia ba sela durante oras 72 nia laran,” nia relata.
Aleinde ne’e, nia hateten, sira bolu fali lezada sira hodi rekolla informasaun hodi loke ona prosesu investigasaun atu submete ba iha Ministériu Públiku, signifika kazu-ne’e sei rezolve tuir dalan legál bazeia ba despaixu sirkulasaun avizu ne’ebé fó sai ona kona-ba regra ba selebrasaun loron Natál no Tinan Foun nian.
“Entaun ami sei halo prosesu investigasaun durante oras 48, hodi konserteza aban sei submete ona ba MP, no sei identifika sasin na’in tolu (3). Husi prosesu ne’e atu eduka joven sira labele komete problema ne’ebé bele fó impaktu ba ema seluk nia-an no problema ne’ebé akontese la rezulta autór balun kanek grave. Maske fatuk balun kona ema maibé motor ida mak hetan estraga tanba suapeitu sira baku rahun,” nia hateten.
PNTL husu ba joven sira atu kria dame ba konstrusaun nasaun
Ho akontesementu ne’e, nia husu ba joven sira hotu tantu feto no mane tamba konflitu ne’e hahalok ida-ne’ebé la dezenvolve konstrusaun pás no estabilidade iha rai Balibo.
“Entaun, oinsá ita atu fó kontribuisaun ne’ebé hakmatek, joven sira tenke iha konxiénsia no esperansa katak loron ida Balibo sei di’ak-liu, maske sei iba dezempregu, solusaun ba joven sira atu esforsu buka nafatin oportunidade hodi kapasita an,” nia apela.
Enkuantu durante selebrasaun tinan foun Komandu eskuadra PNTL postu Balibo rejista kazu konflitu rua no dezastre mout iha tasi Palaka ida.
Jornalista : Alexandra da Costa
Editór : Cancio Ximenes
