Misa dahuluk tinan 2026, kada loron nu’udar inísiu moris foun
DILI, 02 Janeiru 2026 (TATOLI)– Iha misa loron dahuluk tinan foun 2026 Amu-Papa Leão XIV subliña katak tinan foun nu’udar viajen nakloke atu esplora ho esperansa no fiar nian, nune’e konvida sarani sira atu uza kada loron ida-idak nu’udar inísiu ba moris foun nian ne’ebé haraik hosi Maromak nia domin no mizerikórdia.
Sita hosi Vatican News, ne’ebé Tatoli asesa, Amu-Papa Leão XIV hato’o mensajen ne’e bainhira dirije nia misa públika dahuluk tinan 2026 nian, ne’ebé selebra iha Solenidade Maria, Maromak nia Inan, iha Vatikanu, iha Kinta-feira (01 Janeiru). Misa ne’e partisipa husi sarani sira maizumenus 5.500.
Iha ninia omília abertura nian, Amu-Papa reflete kona-ba bensaun husi Livru Númeru nian, ne’ebé foti husi leitura dahuluk iha liturjia mak: “Na’i haraik bensaun no proteje imi. Atu Na’i halo nia oin nabilan ba imi no hatudu mizerikórdia ba imi. Atu Na’i hatudu nia oin ba imi no lori dame ba imi”.
Amu-Papa esplika katak bensaun ne’e orijinalmente diriji ba ema israelita sira, ne’ebé foin hetan libertasaun hosi eskravidaun iha Ejiptu no hetan oferese “moris-hi’as” no “dalan nakloke ba futuru”.
Tuir Amu-Papa, liturjia Solenidade Maria nian, Maromak nia inan, fó hanoin ba ema sira katak loron ida-idak bele sai inísiu moris foun nian, tanba Maromak nia domin laran-luak, ninia mizerikórdia, no umanidade nia resposta livre ba ninia bolu.
“Tanba ida-ne’e ita tenke hakuak loron foun ne’e nu’udar viajen nakloke atu esplora, enkoraja sarani sira atu la’o ba oin ho konfiansa no esperansa”, dehan.
Amu-Papa Leão XIV destaka signifikadu selebrasaun litúrjika Solenidade Maria, Maromak nia Inan, hateten ho Maria nia kooperasaun, Maromak nia prezente iha umanidade nia leet ho “dez-armadu no laiha defeza”, hanesan kosok-oan ne’ebé foin moris ne’ebé hakuak iha beran.
Ida-ne’e, Amu-Papa dehan, hanorin katak mundu la hetan salvasaun ho violénsia, maibé ho esforsu inkansável atu komprende, perdua, liberta, no simu ema hotu lahó kálkulu no ta’uk.
Amu-Papa subliña katak iha Maria nia maternidade divina, realidade rua «dez-armada» mak hasoru malu no unifika katak Maromak, ne’ebé renunsia ninia priviléjiu divinu hotu atu sai ema, no umanidade ne’ebé ho konfiansa no obediénsia simu Maromak nia vontade.
Hodi konklui nia omília, Papa Leão XIV konvida sarani sira atu reflete kona-ba Tinan Jubileu 2025, ne’ebé sei remata iha loron 06 fulan-Janeiru.
Iha nia reflesaun, Amu-Papa sita mensajen hosi Papa Saun João Paulo II iha konkluzaun Jubileu Bo’ot tinan 2000 nian, ne’ebé subliña katak Jubileu maka oportunidade estraordinária ida ba fiar sira atu esperiénsia perdaun ne’ebé simu no fó, hodi hanoin hikas mártir sira, no rona hakilar ema ki’ak sira-nia lian iha mundu.
Liuhusi esperiénsia sira-ne’e, Amu-Papa subliña, ema sira hetan konvite atu sente Maromak nia prezensa ne’ebé salva no ninia domin ne’ebé kontinua hafoun rai ne’e.
Jornalista : Arminda Fonseca
Editór : Evaristo Soares Martins
