DILI, 05 Janeiru 2026 (TATOLI)-Deputada husi Partidu Demokrátiku (PD), Maria Teresa Gusmão, solisita ba munisípiu oan sira atu serbisu hamutuk hodi halo preparasaun ba simu desentralizasaun administrativa no podér lokál husi Governu sentrál.
Nia hateten polítika ne’e di’ak ho prinsípiu atu lori besik programa no dezenvolvimentu ba baze hanesan tuir prinsípiu PD rasik harii nasaun husi baze.
Deputada ne’e observa katak Governu Dasiak halo preparativu ho seriedade atu fahe podér ne’e ba kraik hodi ema hothotu kontribui ba dezenvolvimentu iha ne’ebé ho kapasidade hodi jere rasik idaidak nia munisípiu.
Tanba tuir avaliasaun preliminária katak iha munisípiu lima mak hetan muito bom atu simu podér lokál.
“Espera halo preparasaun no implementasaun di’ak. Buat ida importante liu ba susesu mak serbisu iha team, labele haree ida-ne’e partidu a, b no c, atu atinje prosesu dezenvolvimentu ne’ebé aseleradu”, nia hato’o.
Deputada ne’e konsidera katak serbisu hamutuk importante tebes atu haree ba programa no Orsamentu Jerál Estadu (OJE) ne’ebé trasa hamutuk hodi implementa.
Nia apoia Governu sentrál kontinua halo avaliasaun ba munisípiu sira seluk atu motiva sira hodi esforsu an liután ba halo preparasaun di’ak.
Deputadu husi Partidu Frente Revolusionária Timor-Leste Indepedente (FRETILIN), Antoninho Bianco, mós espera katak Governu sentrál bele atribui ona podér ne’e ba munisípiu sira, maibé importante mak halo preparasaun másima iha rekursu umanu, koloka ema méritu iha área 19 ne’ebé Governu sentrál deskonsentra ba kraik.
Lembra katak, iha 29 Dezembru 2026, Governu sentrál liuhusi Ministériu Administrasaun Estatál (MAE) hamutuk ho Prezidente Autoridade Munisípiu sira hotu halo reuniaun hodi aprezenta relatóriu prelimináriu avaliasaun kondisaun miníma munisípiu sira. Nune’e iha munisípiu lima mak hetan valór muito bom no hitu hetan bom.
Relatóriu ne’e sei aprezenta bá Konsellu Ministru mak sei pronúnsia munisípiu lima ne’e nia naran.
Notísia relevante: https://tatoli.tl/2025/12/29/relatoriu-avaliasaun-indika-munisipiu-lima-hetan-muito-bom/
Jornalista: Nelson de Sousa
Editora: Maria Auxiliadora
