PNTL husu labarik lakon nia família bele hato’o keixa
DILI, 17 Juñu 2026 (TATOLI)—Portavós Polísia Nasionál Timor-Leste (PNTL), Superintendente Xefe Polísia João Belo dos Reis, hateten, família tenke hato’o keixa liga ho labarik lakon iha Munisípiu Baukau foin lalais.
Nia dehan, família rasik daudaun ne’e lakohi koopera ho PNTL hodi hato’o keixa nune’e Autoridade Seguransa buka tuir labarik sira ne’ebé lakon.
“Públiku hotu inklui Parlamentu Nasionál nomós institusaun relevante sira toka maka’as kona-ba kazu labarik lakon, PNTL Munisípiu Baukau hamutuk ho autoridade sira bá to’o duni labarik lakon ne’e ninia uma maibé nia família rasik rejeita atu fó informasaun. Ita kontaktu Xefe Seksaun Kriminál munisípiu sira no Komandante munisípiu sira, no loos duni katak ih munisípiu Baukau labarik ida lakon maibé família rasik mak la koopera hodi hato’o keixa,” Superintendente Xefe Polísia João Belo dos Reis hateten ba Jornalista sira iha ninia knaar fatin, Kaikoli, Kuarta ne’e.
Polísia sira momentu ne’ebá hasoru duni família sira ne’ebé nia oan lakon maibé sira ladún fó informasaun.
“Daudaun ita hein nafatin sira hodi koopera ho sira oinsá mak ita bele investiga kazu ne’e bele la’o, Polísia to’o sira-nia uma mós sira dezvia,” nia akresenta.
Notísia relevante : Organizasaun sosiedade sivíl lori fila ona labarik lakon 100 hosi Indonézia
Família sira informa katak sira sei buka oan ne’ebé lakon, karik la hetan mak bá hato’o keixa.
“Sira lakohi fó informasaun no ida-ne’e difikulta servisu operasaun Polísia nia atu buka tuir labarik ne’ebé mak lakon, maibé hanesan sira dehan katak sira buka to’o la hetan ba mak ba hato’o keixa iha Polísia,” nia katak.
Iha biban ne’e, Komandante João Belo hatutan, Autoridade Seguransa nota informasaun iha rede sosiál katak labarik na’in-lima lakon iha Munisípiu Bobonaru, nune’e membru Polísia sira buka tuir informasaun maibé ema la fó informasaun klaru.
“Iha Munisípiu Bobonaru dehan labarik na’in-lima lakon, depois Polísia buka tuir informasaun ba ema sira ne’ebé fó informasaun ne’e mós la iha responsabilidade atu fó informasaun klareza ba Polísia hodi verifika, entaun ita konsidera ida-ne’e hoax tanba sira mós la hato’o ba Polísia katak sira-nia oan lakon,” nia katak.
Kona-ba informasaun labarik lakon iha Bobonaru, PNTL halo ona koordenasaun ho POLRI.
“Ita seidauk iha dokumentu ofisiál ruma husi POLRI Indonézia, dokumentu ne’ebé virál iha rede sosiál ne’e ema avizu ba sira-nia sidadaun iha ne’ebá mais hanesan ba ita Polísia ho Polísia seidauk iha informasaun ba ida-ne’e,” nia esplika.
Nune’e, Autoridade Seguransa husu nafatin ba sidadaun sira hotu, liuliu inan-aman sira atu kuidadu ho oan sira no halo vijilánsia iha komunidade, nune’e karik iha deskonfia ema oin foun ruma ne’ebé suspeitadu ba aktu ilegál ruma bele informa lalais.
“Família sira ne’ebé mak karik enfrenta situasaun hanesan bele koopera ho Polísia atu ita buka tuir lalais. Ita mós husu ba inan-aman sira atu kuidadu sira-nia oan, kontrola labarik sira, halo vijilánsia iha komunidade no karik deskonfia ema-nia movimentu balun ke ilegál bele hato’o lalais ba autoridade sira hodi halo prevensaun,” nia tenik.
Superintendente Xefe Polísia João Belo dos Reis husu ba públiku sira atu labele lansa informasaun falsa no laiha klareza iha rede sosiál, nune’e evita halo ema pániku.
Jornalista : Natalino Costa
Editora : Julia Chatarina
