Organizasaun sosiedade sivíl lori fila ona labarik lakon 100 hosi Indonézia
DILI, 31 janeiru 2024 (TATOLI)—Organizasaun sosiedade sivíl hosi Timor-Leste no Indonézia serbisu hamutuk ho Governu rua (Timor-Leste no Indonézia), konsege lori hikas ona timor-oan hamutuk 100 ne’ebé lakon durante okupasaun Indonézia, liuhosi programa Reuniaun Labarik Lakon.
“Ita konsege lori fila ona labarik hamutuk na’in-59, hahú hosi tinan 2017 to’o 2023, maibé konta antes CNC, I.P estabelese to’o tinan 2023 konsege lori fila ona labarik lakon hamutuk 100,” Diretór Ezekutivu Centro Nacional Chega, Institutu Públiku (CNC, I.P), Hugo Maria Fernandes, informa ba Agência Tatoli, iha ninia knaar fatin, Balide, kuarta ne’e.
Notísia relevante : MSSI Kontinua Apoia AJAR ba Programa Reuniaun Labarik Lakon ho Família
Dadus lori fila labarik lakon iha tinan 2017 hamutuk na’in-15, 2018 na’in-sia, 2019 na’in-14, 2022 na-in-16 no 2023 na’in-lima.
“Tinan ne’e ita kontinua buka nafatin tanba ita halo parseria ho sosiedade sivíl iha ne’e liuhosi Grupu Traballu Labarik Lakon nomós ho belun Organizasaun Naun Governamentál sira iha Indónezia, sira buka mak ita komunika lori fila mai,” nia akresenta.
Aleinde ne’e, CNC, I.P tinan ne’e sei simu relatóriu ida hosi Australian National University kona-ba avaliasaun impaktu hosi programa reunifikasaun labarik lakon.
“Relatóriu ne’e atu haree programa ne’e la’o di’ak ka lae, no saida mak presiza atu hadi’a ita sei haree hosi relatóriu ne’e mak hadi’a di’ak liután,” nia tenik.
Jornalista : Arminda Fonseca
Editora : Julia Chatarina
